→ كل الوصفات
الأكلة دى لعشاق الرز والبطاطس والأكلات السهلة والسريعة والإقتصادية واللذيذة وكمان بتدفى وشتوية
المقادير
- كيلو الا ربع بطاطس, مقطعة مكعبات صغيرة
- 3 كوب رز مصري, مغسول
- 200 غ لحمة, مكعبات , او فراخ, او كبد الفراخ
- 0.5 لتر عصير طماطم, حوالى 6 حبات طماطم متوسطة
- 3 ونصف كوب شوربة, اختياري وممكن استخدام الماء
- 2 بصلة, كبيرة, مفرومة
- قرن فلفل اخضر, أو شطة, اختيارى
- معلقتين زيت
- ملعقة سمن بلدي
- معلقة دهن حيواني, او لية
- ملعقة كبيرة صلصة طماطم, مركزة
- ملح
- فلفل, مجروش
- للوجه
- قشطة البلدي (وجه اللبن)
طريقة التحضير
- دى صورة مجمعة للمقادير
- هتفرمى البصل وتحطى عليه الملح والفلفل. ولاحسن طعم هتجرشى الفلفل الاسمر طازج في الهاون. ويكون مجروش مش ناعم وده فعلا بيفرق جدا في الطعم
- الرز, هتغسليه وتنقعيه 10 دقايق بس علشان الحباية تفتح وتستقبل التتبيلة وتبقى طعمها رائع. وبعدين هتصفيه كويس وتضيفي عليه البصل. وتقلبيهم على النار وسيبي بقى الرز يشرب من ماء البصل ويبقى وهمي. وضيفى كمان البطاطس, انا ما ضفتش الفلفل لاشطة ولا عادي
- لغاية هنا ومن غير اضافة البطاطس, بقى عندك رز حشو للحمام والفراخ البلدي من احلى مايكون. بس تضيفى عليه ملعقة كبيرة سمن بلدي. بس هنكمل هنا, من غير حمام ولا فراخ
- ولإنها أكلة بلدي, فلازم تستعملى الأدوات البلدي بقى علشان تاخذي احلى نتيجة. يعنى يا إما صينية الومنيوم, او طاجن فخار. بس لو ماعندكيش, اتوكلى على الله وبرده هتطلع تحفة
- حطيت في الصينية ملعقة سمنة بلدي ومعلقة دهن حيواني, او لية يعني ومعلقتين زيت. وسيبيهم يسخنوا حلو اوي على النار, علشان الخطوة الجاية
- لازم الصينية تسخن جدا علشان هننزل بالرز والبطاطس, فما يلزقوش في الصينية. وياخدوا تشويحة حلوة كده
- انا بحط عصير الطماطم ياخد غلوة من غير اي اضافات لمدة 10 دقايق, علشان بس اخد نتيجة احلى
- لما تحسي ان الخليط سخن كويس. انزلى بعصير الطماطم ومعلقة الصلصة. وانزلي بالشوربة لو عندك ولو معندكيش يبقى تحطى الماء
- في مكون اختياري ممكن تحطيه على الوجه لو متوفر ولو مش عاوزة مش مهم وهو القشطة البلدي اللي هي وش اللبن
- وزعى القشطة على الوجه وخليها تاخد غلوة حلوة على البوتجاز الاول. ودخليها على فرن حامي شغال فوق وتحت
- هتعرفى انها استوت لما تشرب ميتها, تقومي تطفى النار من تحت. وتسيبيها تاخد وش من الشواية
- وبس ياستي لو عاوزة تحطي من الاول مكعبات لحمة مستوية براحتك. او لو عاوزة تحطي فراخ مستوية نص تسوية وتكمل تسويتها معاها في الفرن براحتك. وممكن تضيفي كبد الفراخ
- الاكلة دى تتاكل في البرد اللى احنا فيه, بتبقى روعة. بس الاهم انها بتتاكل دافية مش ساخنة. بس برده ممكن تتاكل ساقعة
- طيب لو اتبقى معاكى رز لتاني يوم, هتقدميه بكل بساطة مع اى طبيخ خضار او جمب كباب حلة اللى تحبيه, بس ياستي. قدميها لحبايبك, بالهنا والشفا
عجبتك الوصفة؟
شوف كل وصفاتنا في مكان واحد
كل الوصفات →
شوف كل وصفاتنا في مكان واحد