→ كل الوصفات
#المريول_العالمي #أرز_بسمتي #الجزر #الكراث #السمك #الثوم اللهم صلّ وسلّم وبارك علـى سيّدنا محمد، حبيت نشـارك معاكــم اليـوم ضمــن تحدي المريول العالمي أرز بسمتـي مع سمــك مقلـي 🐟 مـن أطيـب مـا يكـون الأرز يجي على حبة ويجي بزاف 👌🏻بزاف👌🏻 بنيــن 😋، نتمنــى تعجبكــم الطريقــة، أمسيــــة سعيـــدة أحبتـــي 💐🌷💐
المقادير
- كأس ونصف أرز بسمتي أبيض
- 3 ملاعق كبار زيت
- ½ حبة بصلة (الكراث)
- 1 حبة جزر متوسطة
- 2 ملاعق كبار جلبان
- 3 كؤوس ماء ساخن جدا
- الملح حسب الذوق
- على راس الملعقة الصغيرة كركم مخلط مع الزعفران
- على راس الملعقة الصغيرة فلفل أسود
- 1/2 ملعقة صغيرة كمون
- 600 غ سمك
- ملح حسب الذوق
- 3 فصوص ثوم مبشور
- ملعقة صغيرة كمون
- ¼ ملعقة صغيرة فلفل اسود
- ¼ ملعقة صغيرة كركم مخلط مع القليل من زعفران
- ملعقة كبيرة ونص مزيج بين القصبر والمعدنوس مقطعين رقيق
- سميد رطب
- زيت للقلي
طريقة التحضير
- نبدأ بإسم الله، اولا بالأرز، نغسلو مليح من ثلاث إلى أربع مرات بالماء (درجة حرارة عادية للماء) مع فركه بلطف باليد حتى يصفى لون الماء ويتم التخلص من نشا الأرز ونخليه يستقطر جيدا، ونحضر باقي المكونات (نقي الجزر والكراث). ملاحظة: ✔الكاس اللي كيلت بيه الأرز والماء سعته 180 ملل
- في طنجرة نحط الزيت يسخن ونضيف الكراث نكون قطعتو رقيق نخليه يتقلى ويذبال شوية ونضيف عليه الجزر مقطع قطع صغيرة حتى هو نقليه شوية، ثم نضيف الجلبان (البزلاء) وحتى هو نقليه مع باقي المكونات
- في الأخير نضيف الأرز ونخلط جيدا حتى تتشمع كل حبات الأرز بالمادة الدهنية، ثم نضيف التوابل (الملح حسب الذوق، على راس الملعقة الصغيرة كركم مخلط مع الزعفران، على راس الملعقة الصغيرة فلفل أسود، نصف ملعقة صغيرة كمون)
- نخلط الكل جيدا، ثم نضيف الماء يكون ساخن جدا نخلط الكل ونخليه يغلي على نار متوسطة مدة 10 دقائق ثم نقص للنار أقل درجة ممكنة (نار هادئة جدا) ونغلق الطنجرة بطبيعة الحال ونخليه يطيب على خاطرو مدة 10 دقائق أخرى، نطفي عليه ونخليه يكمل طيابو بالبخار فقط من 5 دقائق إلى 10 دقائق ويكون جاهز معانا. ملاحظة:✔ لكل كاس أرز ضفت كأسين ماء
- في هاذ الوقت نروح نوجد السمك، نقيه ونغسلو مليح نحطو في الكسكاس يستقطر نضيف عليه مزيج بين القصبر والمعدنوس مقطعين رقيق مع الثوم مبشور والتوابل (الملح حسب الذوق، ربع ملعقة صغيرة كركم مخلط مع الزعفران، ربع ملعقة صغيرة فلفل أسود، ملعقة صغيرة كمون)، نخلطو مليح من الأفضل نخليه في هاذ التتبيلة مدة لا تقل عن 15 دقيقة باش حبات السمك تتشرب مليح وتجي بنينة
- قبل ما نقليه نضيف عليه السميد الرطب ونحاول نتخلص من الفائض بحكم السمك لا يزال في الكسكاس، نقليه في زيت ساخن
- الكمية اللي نقليها نحطها في ورق ماص للتخلص من الزيت، وهكذا حتى نكمل كل الكمية اللي عندي
- في هاذ الوقت يكون الأرز وجد معانا يجي على حبة روعة روعة وبزاف بنين، من الأحسن في هاذ المرحلة نحركوه بالفرشطية (الشوكة). نصيحة: ✨كي يتشمع الأرز في الأول مليح راه مايلصقش كيف ما كانت نوعية الطنجرة
- ونقدمو بألف ألف صحة وهنا 🐟😋🐟
- يجي بزاف 😋 بنين، وشهية طيبة للجميع👌🏻
عجبتك الوصفة؟
شوف كل وصفاتنا في مكان واحد
كل الوصفات →
شوف كل وصفاتنا في مكان واحد