→ كل الوصفات
#غير_روتنك_جدد_وصفاتك اللهم صلّ وسلّم وبارك على سيدنا محمد، حبيت نشارك معاكم اليوم طبق الأرز بذوق البكبوكة يجي بزااف بنين وخاصة لمحبي البكبوكـة أوالعصبـــانة 😋👌🏻 نقـدرو نقولـو أننـي استعملـت الحشو بلا ما ندير الكرشة اللي نعمروها بحشو الأرز، نتمنـى تعجبكم الطريقـة😍🌼🥰 كيما عجبت عائلتي، نهاركم سعيد أحبتـي.
المقادير
- كيلة أرز بسمتي أبيض مغسول جيدا
- 250 غ دوارة الخروف (القليل من الرية والقليل من الكرشة والمصارن) مغسولين وطايبين في شوية ماء وملح وورقات رند
- حبة بصلة مقطعة رقيق
- ملعقة صغيرة سمن
- 2 ملاعق كبار زيت
- للتوابل نحتاج
- الملح حسب الذوق
- ملعقة صغيرة سكين جبير
- ½ ملعقة صغيرة كركم
- ¼ ملعقة صغيرة فلفل أسود
- ½ ملعقة صغيرة كمون
- رشة من الزعفران (ملون غذائي)
- 3 فصوص ثوم
- حبة طماطم مفرومة
- ملعقة صغيرة طماطم مصبرة
- 2 كيلات ونصف ماء غالي
- ملعقة مزيج بين القصبر والمعدنوس مطحون
طريقة التحضير
- نبدأ على بركة الله أولا بالروز غسلتو مليح مليح وحطيتو في الماء بارد للتخلص من النشويات
- من جهة أخرى كنت غسلت الدوارة مليح وحطيتها تغلي في شوية ماء وملح وورقات من الرند كي طابت صفيتها وخليتها تبرد وقطعتها قطع صغيرة(للأمانة شريت رطل من الدوارة فيها الرية والمصارن والقليل من الكرشة كي طيبتها وقطعتها قسمتها لقسمين وحطيتهم في كيس غذائي ودرتهم في المجمد النهار اللي شريتها مكانش عندي الوقت باش نطيبها) المهم الغذ من ذاك جبت كيس وحطيتو في طنجرة الضغط مع حبة بصلة مقطعة والسمن والتوابل قليتها مليح مليح ثم ضفت الطماطم المفرومة مع الثوم المفروم كذلك وقليت الكل جيدا
- ثم ضفت الزعفران مع الطماطم المصبرة خلطت الكل جيدا ثم ضفت الأرز بعدما صفيتو جيدا من الماء وقليتو حتى هو مليح
- مرقت بالماء غالي (نفس الكيل اللي كيلت بيه الروز كيلت بيه الماء) درت كيلة روز مع زوج كيلات ونص ماء غالي خلطت مليح وغلقت على طنجرة الضغط مدة 10 دقائق بعد الغليان يعني بعد التصفير حسبت مدة 10 دقائق على نار متوسطة، كي فاتت المدة طفيت عليها بلا ما نفتحها أو نزع السيفلي (الصفارة) حتى هدات تماما تقريبا 10 دقائق أخرى عاد حليت عليها صبت الروز شرب كامل الماء وطاب على حبة. ملاحظة مهمة: ✔إذا حليتو على الطنجرة وصبتو مزال كاين الماء زيدو شعلو عليها وخليوها على نار هادئة حتى تتشرب كامل
- ضفت القصبر والمعدنوس خلطت برفق، وها هو واجد يجي بزاف بنين 😋👌🏻😋
- وشهية طيبة
عجبتك الوصفة؟
شوف كل وصفاتنا في مكان واحد
كل الوصفات →
شوف كل وصفاتنا في مكان واحد