→ كل الوصفات

الاتر أو الجاكود تقديم اسراء رشدي

#النمليه مع اني مش نوبيه بس اتربيت على الاكله دي مع العيش الشمسي تقريبا كل أهالي أسوان يعرفوها كويس الاتر أو الجاكود (السبانخ المفروكه) من اشهر الاكلات النوبيه و هي اكله شتويه و بيستخدموا فيها اداه المفراك للهرس بتتاكل مع العيش الكابد أو عيش الدوكه هو عيش نوبي بيشبه القطايف بس بيتميز بكبر حجمه و سبقت و عملت طريقته دقيقة. نجوي العربي في تطبيقات الفطار و يوجد ثلاث انواع من الاتر بالسبانخ و البسله (البازيلا) و السلق و بتستخدم معاهم الخضره (الشبت و الكزبره) و الباميه الناشفه المطحونه و في بعض أهالي أسوان اللي مش بنوبيين بيستخدموا بدل الباميه الناشفه رز هما بتساعدوا على ربط السبانخ الان نسبه المياه فيها عاليه

  • 1/2 كيلو سبانخ
  • بصله متقطعه صغير
  • واحده طماطم متقطعه صغير
  • 3 كوب شوربه
  • ربطه كزبرة
  • 1/2 ربطه شبت او شمر زي ما بيقولوا أهالي أسوان
  • 2 معلقه صغيره ثوم مفروم
  • معلقه كبيره باميه ناشفه (باميه متقطعه ومجففة وبتتطحن بالهون)
  • شطه (اختياري)
  • 1/2 معلقه صغيره كربونات
  1. نغسل الخضره و السبانخ كويس و نأخذ منهم الورق بس
  2. نغلي الشوربه و نحط فيها البصل و الطماطم و ملعقة ثوم صغيرة و ربع ملعقة صغيرة كربوناتو لانه بيساعد على أن الخضار يذوب اسرع و نسيبها تغلي شويه
  3. بعد كده ننزل بالسبانخ و الخضره وربع ملعقة الكربوناتو و نسيبها تغلي شويه حوالي عشر دقائق لحد ما السبانخ تتهري خالص
  4. ننزل بقي المفراك ونفرك كويس لحد ما تنعم
  5. نحط ملعقة الباميه الناشفه وملعقة ثوم صغيرة ونفرك تاني علشان الباميه ماتعملش كلاكيع
  6. في حال أننا هنعملها بالرز بدل الباميه يبقى لازم ننزل الرز مع البصلة في أول مرحلة
  7. وبتتقدم مع عيش الكابد بنفس الشكل
عجبتك الوصفة؟
شوف كل وصفاتنا في مكان واحد
كل الوصفات →