→ كل الوصفات

الباذنجان المخلل بطريقة محلات الفول والطعميه

طول عمري بعشق الباذنجان المخلل الاحمر ده اللي كنا بنشتريه مع الطعميه السخنه الصبح... والباذنجان المخلل انواع في البنفسجي بتاع عربيات الفول ده حاجه فظيعه ويليق على الفول وفي البتنجان البيتي مع الملوخيه والاكل البيتي والباذنجان الاحمر ده بيليق اوي مع الطعميه الصبح علطول لازم كنا نشتريه وفي مره سألت الراجل على الطريقه وهي دي الطريقه اللي قالهالي وطلعت فعلا بالظبط انا لما بعمله جنب الطعميه البيتي بيبقو ميكس لا يقاوم جربوهم

  • 2 باذنجان رومي متقطع شرايح بالعرض
  • 5 فلفل احمر حامي
  • 5 فصوص ثوم
  • ¼ كوب عصير ليمون مركز
  • معلقه صغيره ملح
  • معلقه صغيره كمون
  • معلقه صغيره كزبره ناشفه
  • زيت للقلي
  1. اول خطوه هنبدا نحضر خلطه الباذنجان باضافة الفلفل الاحمر مع الثوم في الكابه او الخلاط
  2. ممكن لو مبنحبش السبايسي نستبدل واحده او 2 من الفلفل الاحمر الحامى بفلفل احمر رومى وممكن نشيل شويه من البذر نخففه لكن لازم نحط الحامي لانه بيدي طعم حلو جداً ومميز ومبيبقاش حراق اوي يعني
  3. هنضربهم في الخلاط او الكابه مع الليمون والملح والكمون والكزبره لحد مايبقوا خلطه متجانسه بدون قطع وناخد الخليط ونقلبه مع الباذنجان ونسيب الباذنجان فالخلطه دي شويه قبل الاكل ياخد من طعمها
  4. لو عايزين الطعم الاصلي اللي بندوقه من الجاهز للباذنجان ده نستخدم فلفل احمر مش اخضر وده لان الفلفل الاحمر بيدي طعم مختلف تماما عن الفلفل الاخضر وهو اللي هيظبط الوصفه
  5. نيجي للبتنجان هنقطعه شرايح بسمك حوالي 2 سم ونقليه في زيت سخن لحد لونه مايبدأ يبقى اصفر محمر كدا هنطلعه ونحط عليه الخلطه فورا عشان يتشربها
  6. في ناس بتحط عالبتنجان ملعقة كبيره ملح قبل ماتقليه وتسيبه حوالي ساعة وتحطه في مصفاه عشان ينزل مايته وميشربش زيت كتير. انا مبعملش الخطوه دي لاني محستش بالفرق الرهيب لما عملتها لكن اللي متعود عليها او حابب يعملها عادي
  7. لازم الباذنجان يفضل فالخلطه شويه قبل التقديم عشان يتشربها ويأخذ طعمها بيبقي احلى بكتير ومتخلل صح وبيتاكل اكتر حاجه تليق له مع الطعميه في الفطار وبالهنا والشفا
عجبتك الوصفة؟
شوف كل وصفاتنا في مكان واحد
كل الوصفات →