→ كل الوصفات
احلى سندوتش هو البرجر بس الاحلي لما يتعمل في البيت انضف واطعم
المقادير
- كيلو لحم مفروم به نسبة دهون
- 2 كيس توابل برجر
- معلقه كبيرة بابريكا
- معلقة ملح صغيرة
- معلقه صغيرة فلفل اسود
- بياض بيضه لو كبيرة ولو بيض صغير يبقى بياض 2 بيضه
- 2 ملعقه كبيرة بقسماط مطحون
طريقة التحضير
- في إناء عميق نضع اللحم المفروم وعليه الملح والفلفل وتوابل البرجر والبابريكا والبقسماط المطحون ونخلطهم كويس جداً جداً بعدين نضيف بياض البيض ونخلطه كويس لحد ما يمتزجو كلهم سوا
- الخطوة دي هي المهمه ازاي نطلع البرجر شكله زي اللي برة بصي يا ستي هتجيبي اي غطا لبرطمان قديم طبعاً البرطمانات القديمة دي هوايه اننا تشيلهم😁 وتجيبي كيس سندوتشات وتفتحيه نصين وتحطي نص فالغطا وعليه شويه زيت والنص التاني يبقى برة وتجيبي جزء من اللحمة اد برتقاله وسط وتحطيه فالكيس الى فالغطا وتضغطي هيتشكل معاكي قرص البرجر بسهوله تلفي بقي القرص بنص الكيس اللي برة الغطا وتكرري ده مع بقية اللحمة ولما تخلصي كل الكمية دخليها الثلاجه ساعة
- بعد كده فجريل او طاسه تيفال ادهني زيت خفيف اوي وحطي بقي البرجر بتاعك يتشوي لحد ما تخلصي الكمية بتاعتك كلها
- طبعاً هتكوني محضرة فلفل اخضر حلقات طماطم حلقات انا عن نفسي بحب اشوي مكان شوي البرجر بحب اشوي الفلفل والطماطم بيبقو تحفه
- وتكوني مقطعة كمان خس الكابوتشي ومايونيز وكاتشب ومستردة (خردل) اذا حابه
- ازاي بقي نعمل احلى سندوتش هتجيبي الكايزر تفتحيه وتحطي شويه مايونيز وكاتشب وعليهم ورقة كابوتشه والبرجر وعليه الجبنة المربعه بتاعة البرجر (بردو اذا حابه) وعليهم الطماطم والفلفل ،الحشو جوة الساندوتش ده بتاعك ممكن بصل وطماطم وفلفل وبس ممكن جبنة وطماطم اللي تحبيه اعمليه وبس هيطلع معاكي والله والله احلى برجر
عجبتك الوصفة؟
شوف كل وصفاتنا في مكان واحد
كل الوصفات →
شوف كل وصفاتنا في مكان واحد