→ كل الوصفات
#المريول_السوبر البيتزا من اجمل وأطعم الاكلات على قلبي 🥰 واليوم الي بعمل فيه بيتزا في البيت بجد كلهم بيكونو فرحانين جدا أكلة لا يختلف عليها الكبار و الصغار اتعلمت اعملها في وقت الكوفيد كنت بعتمد ديما على اني عايشة في ايطاليا وبجيبها جاهزة لكن في الوقت ده كان صعب طبعا من الحظر الي كان موجود فقررت اعملها بنفسي لقيت أن تكلفتها في البيت اقل بكتير جدا من ثمن الواحدة ومن وقتها وانا بعملها في البيت وقليل جدا لما نأكلها برة بعتذر طبعا لان على ما خلصت كانت في بيتسات بحشوات مختلفة اتاكلت 😂 مش لحقت تصورها بس هحاول اقولها بالتفصيل
المقادير
- 1 كيلو دقيق
- 1 ظرف خميرة
- 10 جرام قطعة خميرة
- 1/4 كوب زيت
- 1 كوب و نص ماء دافئ
- 2 ملعقة كبيرة زبادي (اختياري)
- 1 معلقة سكر
- 1 معلقة ملح
- 1 كيلو موزاريلا
- 1/4 من كل فلفل الوان أو من واحد بس
- 1/4 بصلاية
- 1 علبة تونة
- 3 اصابع هوت دوج
طريقة التحضير
- اولا هنضيف الخميرة مع كوب ماء دافئ مع معلقة سكر ونتركهم ١٠ دقائق حتى تتفاعل الخميرة نضيف باقي المية و الزبادي ونقلبهم كويس ونضيف الدقيق تدريجيا وممكن تحتاجي معلقتين دقيق زيادة عن الكيلو وده على حسب نوع الدقيق نضيف كمان الزيت ونعجن لمدة ١٠ دقائق ولو عندك عجان هيكون احسن واوفر للوقت والمجهود ونسيب العجينة تخمر براحتها وده على حسب درجة حرارة الجو
- ولغاية ما العجينة تخمر هنحضر الحاجات الي هنحطها على وش كل بيتزاية
- انا اليوم ده مش لقيت موزاريلا متقطعة جاهزة فجبت القطع وقطعتها بنفسي وسيبتها حلقات لكن انتم ممكن تقطعوها قطع صغيرة زي الجاهزة وكمان هنقطع قرون الفلفل شرائح رفيعة مع قطعة البصل وكمان الهوت دوج حلقات والتونة هنصفي منها الزيت كويس جدا ونسيب كل ده على جمب ونحضر الصلصة لو عندك معجون صلصة هتاخدي ٤ أو ٥ معالق كبار وهتخففيهم ب ٢ ملعقة مية وتضيفي بهارات ملح وفلفل اسمر و مرقة دجاج و اوريجانو وقلبيهم كويس وبكدة تكون الصلصة جاهزة
- لو عندك صلصة طماطم حطيها على النار تتسبك مع معلقة زيت ولازم تبرد خالص ممنوع تتحط على العجينة وهي سخنة وبعد كدة حطي التوابل الي قولنا عليها
- كيلو الدقيق عمل معايا ٦ بيتزات وطبعا ده على حسب بتحبو سمك البيتزا قد ايه رفيعة أو سميكة انا بعملها وسط علشان كدة عملت معايا ٦ لو ارفع من كدة ممكن تعمل ٧
- هتدهني كل صنية بنقطة زيت وتقسمي العجينة وتفردي كل كورة في الصينية وتفردي التانية لغاية ما تخلصي كل الفرد وترجعي تاني لاول واحدة هتلاقي العجينة ريحت شوية عن أطراف الصينية هتكمل فردها وكدة يبقى تمام مش تريح تاني وتفردي معلقة ونص صلصة على كل العجينة وعليها الحشوة الي تحبيها وعليها الموزاريلا وتكوني مشغلة الفرن ومسخناه من تحت مع المروحة لو موجودة والشواية لا خالص لأنها هتحرق البيتزا وبالف هنا على قلوبكم
عجبتك الوصفة؟
شوف كل وصفاتنا في مكان واحد
كل الوصفات →
شوف كل وصفاتنا في مكان واحد