→ كل الوصفات

الخيار المخلل السريع🥒هتاكليه بعد ساعتين✌️وهيفضل مقرمش😋

طبعا كلنا بنحب المخللات عشان تفتح نفسنا على الاكل.. قال ايه من كتر مانفسنا مسدودة.. وبالذات في الشتاء☔ 😁😂 عشان كده قلت اعملكوا الخيار السريع 🥒هتاكليه في نفس اليوم وممكن بعد ساعتين✌️.. عشان اول لما يخلص نعمل غيره علطول.. يعني من الاخر.. نخلله.. ناكله.. نخلصه.. نخلله. ناكله.. نخلصه.. وهكذا 😂 وهيفضل معاكي ان شاء الله لآخر واحدة مقرمش 😋 #تحدي_الشيف_الذهبي #الشيف_الذهبي #مخلل_الخيار_السريع #مخلل_الخيار #مخلل_الخيار_في_المية_المغلية #وصفة سريعة #اكلة_سهلة_سريعة #مخللات #كوكينا_cookina

  • كيلو خيار رفيع🥒
  • 5 كوب ماء🥛
  • 5 ملعقة كبيرة ملح مش مليانين قوي🍚
  • 5 ملعقة كبيرة خل🍶
  • فص توم مقطع شرائح
  • معلقة صغيرة كسبرة ناشفة
  1. اول حاجة هنحط في حلة المية🥛 والملح🍚 والخل
  2. وهنقلب كويس جدا لحد لما يدوب الملح🍚 تماما في دباديبكوا😂
  3. وبعد كده اول ماتغلي🌡️ كويس هنطفي عليها ونشيلها من على البوتجاز🔥
  4. وبعد كده هنحط الخيار في المية المغلية🌡️عشان نعذبها 😁
  5. وهنغطيها كويس عشان تعمل حمام بخار وتفتح المسام 😂 ومش هنفتح عليها غير لما تبرد تمام ونخليها متلجة وسقعانة😆
  6. وبعد ماتبرد.. هيكون شكله كده واستوي.. وهيقولك ارحميني انا استويت عالاخر وكُليني.. بس اوعي تسيبيني😂 شايفين الشعر ولا نزار قباني 😂😁
  7. بعد كده هنجيب برطمان والأفضل زجاج عشان لو حد عملك حاجة ومضايقة تكسريه على دماغه🤣🤣.. وطبعا انا غسلته بمية سخنة عشان اعقمه عشان مايبقاش فيه اي شوائب ويبقى ملوث يييع 😁
  8. وحطيت اول حاجة الثوم والكزبرة الناشفة
  9. وبعد كده رصيت الخيار وخليته واقف جنب بعض ومتذنب كده 😁
  10. وضيفت محلول الملح لحد لما غطي الخيار لفوق
  11. وضغط عليه ضغطة بسيطة وقفلت الغطا كويس ولو الغطا بتاعك مش بيتقفل كويس حطي كيس واقفليه واخنقيه واكتمي نفسه 😁😂
  12. وهنا ده شكله.. بصي بقى التعليمات⛔⛔ ممكن تاكليه دلوقتي بس لو دوقتيه ولقتيه لسه مش حادق سيبيه شوية عشان هيبقى محتاج يتملح شوية.. وهتسيبيه على الرخامة لتاني يوم وبعد كده هتحتفظي بيه جوة التلاجة.. ولو عاملة كمية كبيرة وعايزاه يفضل مقرمش لآخر واحدة ضيفي مع محلول الملح معلقة سكر كبيرة🍚 مع كل المكونات
  13. وبالهنا والشفا على قلبكوا الجميل❤️🌹
عجبتك الوصفة؟
شوف كل وصفاتنا في مكان واحد
كل الوصفات →