→ كل الوصفات

الطمينة الجزائرية

#جزائرية #بنة_عظيمة اللهم صل وسلم وبارك على سيدنا محمد، وصفة اليوم الطمينة الجزائرية التقليدية، تجي بزاف بنينة، تختلف في مكوناتها عن تقنتة، نتمنى تعجبكم طريقتي في تحضيرها، وكل عام وأنتم بألف خير 😘🌼😘 الطمينة الجزائرية رمز للأفراح و المسرات و هي وصفة تقليدية قديمة جداً توارثناها عبر الأجيال تقدم في المناسبات و الأفراح و الاعياد الدينية و تكون حاضرة بقوة في الاحتفال بالمولد النبوي الشريف أو عند قدوم مزيود جديد للعائلة. و للطمينة الجزائرية عدة أنواع بعضها يحضر بالسميد المحمص مع الزبدة و العسل و تزين بالقرفة و اللوز و توجد الطمينة البيضاء أيضا بالسميد التي تحضر عند الزفاف في منطقة الشرق و يوجد النوع الأخر الذي يحضر من القمح و الحمص المطحون كالبسيسة و الزرير والروينة و التقنتة تحضر بتحميص الفرينة بالزيت وتضاف لها مكسرات حسب الرغبة 😉 وغيرها من وصفات الطمينة اللذيذة جداً و الى يلزمها دايما الشاي و القعدة الزينة رفقة الأهل والاحباب و العايلة . في كل ولايات الجزائر العريقة تختلف مكوناتها من منطقة لاخرى ولها عدة انواع مثل طمينة الفرينة و القوفريط و القمح و مننسوش السلو لي تتميز بيه مناطق الغرب الجزائري. وفي السنوات الاخيرة صارت المرأة الجزائرية تتفنن في التنويع في الطمينة فأصبحت الطمينة البريستيج مطلوبة جداً و خصوصا طمينة الشوكولاتة اللذيذة 😋 #الطمينة

  • 2 كيسان سميد متوسط
  • كاس عسل
  • كاس زبدة أو مارغرين ذايبة
  • كاس ناقص صبع قاوقاو محمص ومطحون
  • كاس ناقص صبع بسكويت مطحون (بتي بور)
  • 2 ملاعق حلوة الترك
  • 4 ملاعق ماء الزهر
  • رشة ملح
  • ¼ ملعقة صغيرة قرفة مطحونة
  • للتزيين نحتاج
  • حبات دراجي ملونة
  • لوز إفلي محمص
  • حبات من الكاجو
  • القليل من القرفة
  1. نبدأ على بركة الله بتحميص السميد من الأفضل ليلة من قبل باش يبرد مليح. أنا حمصتو فوق الطاجين الخاص بالمطلوع على نار هادئة مع التحريك المستمر باش ما يتحرقش، ويبقى اللون على حسب كل واحد. ملاحظة: من الأفظل تحريكه بقطعو كارطون أحسن من الملعقة
  2. ندفي شوية زبدة أو مارغرين ونعبر كاس ونوجد كل المكونات نطحن البسكويت والقاوقاو، ونعبر بنفس الكاس العسل ونكيل السميد وجميع المكونات الأخرى، نحط الزبدة في كاسرونة ونديرها فوق النار تسخن مليح ما لازمش تغلي
  3. نضيف عليها العسل و البسكويت المطحون وحلوة الترك ورشة الملح والقرفة وماء الزهر ونميكسيها بالبرا ميكسور جيداً حتى تتجانس المكونات ويصبح القوام شوية ثقيل. ملاحظة: هاد العملية تساعد باش من بعد ما تصفيش لي دام
  4. نضيف القاوقاو المحمص والمطحون ندخلو مليح ثم نضيف السميد بالتدريج نخليها شوية جارية، دات معايا زوج كيسان معمرين
  5. نغطيها ببابي فيلم ملامس للسطح ونخليها مدة ساعة تريح. في هاذ الوقت نحمص القليل من اللوز إفلي، كي تريح تحكم روحها شوية وهذاك السميد يجي رطب في الفم بمساعدة ماء الزهر اللي ضفناه
  6. فرعتها في صحون التقديم وزينتها تزيين بسيط كما هو واضح في الصور
  7. وتقدم بألف صحة وهنا جات بزااااف بنينة 👌😋👌
عجبتك الوصفة؟
شوف كل وصفاتنا في مكان واحد
كل الوصفات →