→ كل الوصفات

الكبيبه الشامية - وصفات رمضان

بالمقادير المظبوطه وكل الملاحظات الي تخليها تطلع مظبوطه معاكي ان شاء الله

  • 2 كوب معياري برغل ناعم (الضحي)
  • 3 كوب معياري ماء مغلي
  • كوب ونص دقيق منخول
  • 1 بصلة وسط مفرومة ناعم
  • 1/2 كوب زيت نباتي
  • معلقه كبيره ملح
  • 1/2 معلقه نعناع ناشف
  • معلقه صغيره فلفل اسود
  • معلقه صغيره بهارات السابعه
  • 1/2 كيلو لحمة مفرومة
  • 3 بصل وسط مقطع صغير
  • 1/2 فلفل رومي احمر مقطع صغير
  • 2 معلقه كبيره دبس الرمان
  • معلقه صغيره بابريكا
  • معلقه صغيره بقدونس مجفف
  • 1/2 معلقه صغيره قرفة بودر
  • معلقه صغيره كمون
  • ملح / فلفل اسود
  • رشة جوزه الطيب
  • 1/2 كوب عين جمل (جوز)او بيكان (جوز اوروبي)
  • 1/2 معلقه صغيره سمنه بلدي
  1. اولا هنعمل عجينه البرغل : نطحن البرغل في المطحنه مرتين ثم نضع عليه الماء المغلي ونقلب كويس بالمعلقه (علشان الماء يتوزع على كل البرغل ويتنقع كويس) ونغطيه بستراتش راب او فوطه كوي لمده ساعة والعجينه دي بطريقه فاطمه ابو حاتي الوحيده اللي طريقتها ظبطت معايا
  2. وفي هذه الاثناء ثانيا نعمل الحشو : بنجيب وعاء ونضع سمنه وزيت يسخن ننزل باللحمه المفرومه ونقلب كويس ونضع رشة فلفل اسود ثم ننزل بالبصل ونقلب ثم ننزل بالتوابل كلها ونخلط كويس ثم ننزل بدبس الرمان ونخلط ولما تقرب تستوي ننزل بالفلفل الاحمر ونقلب واول ما تستوي نطفي عليها ونتركها تبرد تماما
  3. ولما تبرد اللحمة المفرومه نضع عليها المكسرات (في طاسه نضع السمنه تسخن ننزل بالمكسرات تشوح علشان تفضل مقرمشه وحلوه)
  4. وبعد الساعه نرجع لعجينه البرغل هتكون اتشربت الماء وتطريت (احسن نوع الضحي بيشرب الماء باقي الانواع والسايب بتفضل حبةالبرغل ناشفة ومحببه) هنعجنها بايدنا ونخرج السخونيه منها
  5. ثم نضع على العجينة (الدقيق + البصله المفرومه وندعكها بايدنا علشان تكون ناعمه + التوابل + الزيت) وندعك كله مع العجينة كويس جداً لمده ٦ قايق ونغطيها علشان وجهها مينشفش ونبدا نشكل العجينة بشويه زيت
  6. هيكون معانا طبق في زيت ندعك ايدنا وناخد كوره من العجينة ونبدا نشكله ونخليها رقيقه مش تخينه علشان تستوي كويس ونضع الحشو ونضغط ونملها حشو كويس علشان جواها ميبقاش فاضي وتشقق ونقفل الطرف بايدنا ونعمل شكل البوذ من الطرفين زي الصوره كده ونضعهم على صينية عليها كيس بلاستيك علشان متلزقش وتغلبك ونكمل كل الكمية بنفس الطريقه
  7. بعد التشكيل ندخلها الثلاجه نص ساعة (ولو هنحفظها ندخل الصينية في الفريزر تجمد نفرزها في اكياس عادي بس تجمد الاول)
  8. بنجيب حله ونضع زيت غزير ونار وسط او اقل بسيط علشان تستوي من جوه كويس ومنحركش الكبيبه خالص اول ما تنزل نستوي لونها يبدا يغير ثم نحركها من كل الجوانب تأخذ لون ذهبي وتطلع على ورق مناديل تشرب الزيت الزياده ونجيب طبق التقديم ونضع بقدونش ثم نرص الكبيبه الجميله وبالف هنا
  9. ملاحظات : - احسن نوع برغل الضحي بيشرب الماء وبيكون نضيف باقي الانواع والسايب بتفضل حبةالبرغل ناشفة ومحببه وفيها تراب عن تجربه -ممكن نضع بدل البقدونش الناشف في الحشو بقدونس عادي بس الورق بس مش العيدان ونقع صغير - وممكن بدل عين الجمل او البيكان نضع بشر لوز او ممكن نستغني عنها لو مش موجوده - لو شققت منك بعد التشكيل ودخلها الثلاجه ممكن بشويه زيت تظبطي تشكلها
عجبتك الوصفة؟
شوف كل وصفاتنا في مكان واحد
كل الوصفات →