→ كل الوصفات

الكشري المصري

الكشري أكله شعبية مصرية ومن تراثنا الجميل الأصيل ومعظمنا بيحبها جدا طريقته سهله جدا جربوها هتعجبكم 💖

  • ½ كيلو مكرونه مشكٌلة إسباجيتى ومقصوصه او اللي تحبيها
  • كيلو طماطم عصير+نصف معلقه صغيره سكر
  • ¼ كيلو عدس بجبة (أسود)
  • تمن كيلو حمص الشام منقوع قبلها بساعتين
  • كوب أرز
  • نص كوب شعيرية
  • 3 بصلة كبيرة مقطعه مربعات او جوانح قصيره
  • معلقتين ونص كبار ثوم مفروم ناعم
  • كوب خل
  • معلقة ونص كبيرة دقيق
  • معلقتين شطه
  • زيت لقلي البصل وللاستخدام
  1. نسلق المكرونة مع بعض مع ربع معلقه صغيره ملح وملعقة صغيرة خل ولازم تكون نفس الاسم يعنى من نوع اكياس واحد
  2. بجانب المكرونه نسلق العدس والحمص حطوهم كل واحد في حلة صغيرة لوحدها وجمب بعض عالبوتجاز عشان مناخدش وقت
  3. اول ما المكرونة تستوى نصفيها خمس دقايق ونقلب فيها معلقتين كبار زيت ونحطها في حلتها تانى ونغطيها ونركنها علي جمب ونصفي العدس لو استوى ونحطه في طبق ونغطيه والحمص كمان لو استوى كويس
  4. ونحط 3 معالق كبيرة زيت في حلة عالنار ونحط معلقتين فقط من الثوم ونشوحها لحد ما ياخد اللون الذهبي ونحط الطماطم وربع الكوب الخل واما تتسبك حطى نص معلقه صغيره سكر والملح حسب الرغبه ممكن من نص ملعقه صغيره لمعلقه صغيره كامله
  5. حلة تانيه مكان العدس مثلا ونحط معلقتين كبار زيت والشعرية ونقلبها لحد ما تاخد لون ذهبي ونكون غسلنا الارز ونحطه ونقلب كويس جدا ونحط المية بمقدار كوبايه وربع وربع معلقه صغيره ملح
  6. ونحط طاسة فيها زيت علي ما يسخن نكون قلبنا البصل في الدقيق ونحطه يتقلي لحد ما ياخد اللون الغامق شوية
  7. عاوزين تعملو دقة وشطه اقولكم ازاى هاتو نص معلقه الثوم اللي فضلت وقليها في معلقه زيت وزودو ربع كوب ماء ونص كوب خل وربع معلقه كمون سادة وربع معلقه صغيره ملح وعصير ليمونة منزوعة البذر
  8. حطو بقي الشطه في معلقه زيت بارد وقلبوها وبعدين حطيها عالنار واول ما تسخن حطو مغرفه واحده صلصة من اللي عملاناها للكشري وتسبوها تغلي لحد ما تفصل الزيت بس الشطه هاتوها مشطشطه من عطار كويس هتبقي احلي من شطة الزيت في المحلات😉
  9. نرص الكشري ازاى ماهو لازم له رصه عشان الشكل العام يطلع جميل اولا حبة رز تحت وبعدها مكرونة وبعدها العدس ثم الصلصة ثم البصل ثم الحمص الكميات حسب الرغبه طبعا وألف هنا وشفا 💖
عجبتك الوصفة؟
شوف كل وصفاتنا في مكان واحد
كل الوصفات →