→ كل الوصفات

اللحم المردوم مع البصلة والزبيب

#مريولي_باسمي #بصل اللهم صلّ وسلّم وبارك علـى سيّدنا محمد، حبيـت نشـارك معاكـم اليـوم ضمــن تحدي مريولي بإسمي، اللحم المردوم مع البصلة والزبيب، طبق بزاف بنين 😋👌🏻😋، نتمنى تعجبكم الطريقة🥰، أمسية طيبة أحبتــــي💐💖💐.

  • قطعتين من لحم الحروف
  • حبة بصلة صغيرة مفرومة
  • 2 ملاعق كبار زيت
  • الملح حسب الذوق
  • عود قرفة
  • ½ ملعقة صغيرة سكين جبير
  • ¼ ملعقة صغيرة فلفل أسود
  • ¼ ملعقة صغيرة ممسوحة كركم
  • على راس الملعقة زعفران (ملون غذائي) إختياري
  • كاس صغير ماء سخون
  • حبة طماطم متوسطة مقطعة على زوج
  • كيلو بصل من الأحسن يكون الأبيض
  • 2 ملاعق كبار زيت
  • ملعقة صغيرة زبدة
  • عود قرفة
  • الملح حسب الذوق
  • رشة من الزعفران
  • كاس إلا ربع زبيب
  • ملعقة صغيرة سكر
  • حبات من القرقاع (الجوز)
  1. نبدأ على بركة الله، أولا نفرم البصل ناعم وفي إناء نحط قطع اللحم مع التوابل (الملح سكين جبير، الفلفل الأسود، الكركم والزعفران) مع الزيت والبصلة المفرومة
  2. نخلطهـم مليـح مليـح ونحاول ندخـل التتبيلة جيدا في قطع اللحم نغلف الإناء ببابي فيلم وندخلو للثلاجة مدة ساعتين. ملاحظة مهمة: شحال ما بقى اللحم في التتبيلة يجي بنين أكثر وإذا مكانش عندك الوقت نصف ساعة تفي بالغرض. نجيب قدرة الفخار (الطين) هاذ القدرة موجودة في كل بيت جزائري أكيد 🥰، نحط فيها قطع اللحم وما تبقّى في الإناء نفرغ عليه ماء يكون غالي ونعاود نفرغو فوق اللحم. ملاحظة مهمة: ✔الكاس اللي عبرت بيه الماء الساخن سعته 70 ملل
  3. نضيف حبة طماطم مقطعة على زوج من فوق ونغطي بورق الزبدة كنت نفختو بالماء ومن فوق زدت غلقت بورق الألمنيوم
  4. دخلت القدر إلى الفرن المسخن مسبقا على أعلى درجة وكي دخلتها نقصت على النار خليتها أقل من المتوسط مدة ساعتين ونصف. ملاحظة مهمة: ✔كي فاتت ساعتين فتحت عليها صبتها عاد خاصها شوية كملت لها نصف ساعة أخرى يعني مدة الطهي في الإجمال ساعتين ونصف
  5. في هاذ الوقت حطيت البصلة كنت نقيتها وغسلتها قطعتها شرائح وحطيتها في كاسرونة ضفت الزيت والزبدة مع الملح ورشى من الزعفران وعود قرفة ونخليها تتقلى على نار هادية بلا ما نضيف لها الماء نهائي. ملاحظة: من الأحسن استعمال البصل الأبيض لكان نستعملو الأحمر كي يطيب يجي لونو غامق
  6. وهذاك الزبيب غسلتو مليح وخليتو يستقطر ضفتو على البصلة لي كانت قريب توجد
  7. كي طابت البصلة، قبل ما نطفي عليها ضفت ملعقة صغيرة سكر (إضافة إختيارية) خلطت جيدا خليتها دقائق بسبطة وطفيت عليها
  8. فرغت البصلة في صحن التقديم ومن فوق حطيت قطع اللحم وزدت زينت بحبات القرقاع (الجوز). ملاحظة مهمة: ✔ اللحم يطلق المرقة مع أنو ماضفناش بزاف الماء، وتجي بزاف بنينة وخاثرة ويجي طايب زبدة
  9. وقدمتو بألف صحة وهنا😋👌😋
عجبتك الوصفة؟
شوف كل وصفاتنا في مكان واحد
كل الوصفات →