→ كل الوصفات

المكرونة الجارية (المبكبكة) المشهورة عند البدو والليبيين🥘 احلى اكله فى الشتاء

ابسط ما يقال عنها اسرع اكلة لذيذة,طبق مختلفين على اصله ناس كتير بتقول انه ليبى جدا والبعض بيقول دا طبق خاص بالبدو عموما سواء فى ليبيا او بدو مرسى مطروح فى مصر.فى ليبيا بيسموها مكرونة مبكبكة ودا عشان صوت صلصة الطماطم وهى بتبكبك على النار ,وفى مرسى مطروح بيسموها مكرونة جارية ودالان من عادات وتقاليد البدو الجميلة ,العيله بتتجمع وياكلو فى صوانى كبيرة وعشان المكرونة بتجرى وهما بيغرفوها سموها جارية.وسواء كانت امبكبكة ليبية او جارية بدوية فهى اكلة لذيذه جدا و مناسبة للشتاء.يعنى الناس كلها هتكون متلجه جنبك وانت قاعد عندك ثبات انفعالى محصلش و بتشع حراره على اللى حواليك .مش بس كدا دى من الوصفات المحترمة صديقة الام العاملة لأنها بتجهز كلها فى حلة واحدة.ياللا بينا نبدء عشان جوعنا,بسم الله

  • زى ما تحبوا اه والله زى ما بقولكم كدا بس انا هقولكم على المقادير اللى عملتها
  • 500 جم لحم النوع اللى نحبه لكن الافضل لحم ضانى
  • 350 جم مكرونة اى نوع والافضل يكون نوع فيه تجويف عشان يدخل الصوص السخن جواه
  • 2 ملعقة كبيرة زيت
  • ماء مغلى
  • عود قرفة
  • مكعبات بصلة كبيرة مقطعو
  • 3 فص توم مهروس
  • 2 طماطم وسط مكعبات
  • 2 طماطم عصير
  • 1 فلفل اخضر مقطع مكعبات
  • فلفل اسود
  • ملح
  • كمان ممكن نضيف صلصة
  • ملعقة كبيرة بابريكا
  • بقدونس اخضر للتزيين
  • ممكن نضيف اى خضار بنحبه وممكن شطه
  1. نشوح اللحم فى الزيت لحد ما تاخد لون جميل نرفعها من الزيت نفس الزيت نضيف ليه عود القرفه والبصل ونقلب لحد ما ياخد لون شفاف نضيف التوم
  2. بعدين قطع الطماطم والفلفل ولو فى اى خضار تانى نضيفه نضيف عصير الطماطم والبابريكا و الفلفل الاسود ونسيبها تغلى نضيف اللحم مره تانية لخليط الطماطم ونسيبهم على نارهاديه لحد ما اللحم تقريبا يبقى فاضل ليه دقايق ويستوى نضيف ماء مغلى حوالى كوبين مع الملح وممكن جزء من البقدونس والماء بنزود لو احتاجنا
  3. نتأكد ان الصوص بيغلى كويس ننزل المكرونه على نفس النار الهاديه ونغطى الحله
عجبتك الوصفة؟
شوف كل وصفاتنا في مكان واحد
كل الوصفات →