→ كل الوصفات
طريقة طويله شويه بس هتطلع نجرسكو مالهاش حل 😋😍 و هتدعولي 😊
المقادير
- كيس معكرونه فيتوتشيني
- 0.5 كيلو صدور فراخ فيليه
- معلقة سمن كبيره
- زيت
- بصلة كبيره
- 2 فلفل اخضر او الوان
- 0.5 علبة مشروم
- معلقة عسل كبيره
- معلقة مسترده
- ملح
- فلفل اسود
- بهارات حبهان و بابريكا و بصل و ثوم بودره
- جبنه موزاريلا
- 3 ملاعق كبيره دقيق
- 2.5 كوب حليب
- علبة كريمه لباني طهي
طريقة التحضير
- هتجيبي حله كبيره تسلقي فيها المكرونه.. وحطي في ماء السلق رشة ملح ومعلقة زيت.. وطي النار و سيبيها لحد ما تستوي و غطيها
- هتجيبي صدور الفراخ تقطعيها مكعبات صغيره و تجيبي طاسه غويطه و تحطي فيها ملعقة كبيره سمن و تشوحي فيها الفراخ على نار متوسطه لحد ما تبيض كده وتنزل ميتها خمس دقايق بس و تشيليهم في طبق
- في نفس الطاسه دي هتحطي شوية زيت و تقطعي بصلة كبيره تشوحيها و تقطعي فلفتين اخضر او الوان و مشروم و تشوحيهم مع البصل على نار متوسطه
- هتجيبي الفراخ تحطيها عليهم و تتبلي بقى ملح و فلفل و بابريكا و بصل بودره و ثوم بودره و حبهان ومعلقة عسل كبيره و لو عندك مسترده حطي حبه.. قلبي كويس و وطي الشعله و سيبيهم يتسبكوا.. و حطي عليهم شويه موزاريلا
- في حله تالته 😥 صغيره.. هتجيبي الدقيق يتشوحوا في شوية زيت و تحطي عليهم الحليب و تقلبي لحد ما تتقل شويه و لو عندك العلبه الصغيره بتاعت الكريمه اللباني الطهي حطيها على البشاميل دا و قلبي و ملح و فلفل و حطي شوية جبنه موزاريلا عليه.. ما تخليش قوام البشاميل تقيل خليه متوسط و اطفي عليه
- صفي المكرونه من الماء واغسليها و حطي في حلتها شوية زيت و حطي المكرونه و تبليها بملح وفلفل اسود وقلبيها
- هتجيبي صينيه كبيره مرتفعه.. تحطي نص المكرونه و توزعيها كويس.. و ترشي عليها شوية بشاميل.. و بعدين توزعي خلطة الفراخ فوقيها و عليها رشة بشاميل تانيه خفيفه كده.. و بعدين النص التاني للمكرونه. و بعدين باقي البشاميل وزعيه حلو اوي على الوش.. و اخيرا خدي شويه حلوين كده جبنه موزاريلا و وزعي على وشها كويس
- تدخليها الفرن على درجه 200 لمده نص ساعه تقريبا لحد ما تحمر من فوق زي الصوره (من غير ما تفتحي الشوايه).. وتطلعيها تبرد شويه و سيبيها متغطيه شويه عشان الجبنه تفضل سايحه من فوق.. وبالهنا والشفاااااا 😋
عجبتك الوصفة؟
شوف كل وصفاتنا في مكان واحد
كل الوصفات →
شوف كل وصفاتنا في مكان واحد