→ كل الوصفات
طريقة عمل باستا فلورا - تارت بالمربى سهلة ولذيذة. اكتشفوا الوصفة الاصلية المضبوطة بالخطوات مع مكونات بسيطة وطريقة تحضير سهلة وسريعة.
المقادير
- 3 كوب وربع دقيق (407 جرام) أقل من النص كيلو
- 1/2 كبايه سكر ناعم (112جرام)
- 1 كبايه زبدة طرية (200 جرام)
- 2 بيضة
- معلقة كبيره مش مليانة بيكنج باودر
- رشه ملح
- 2 فانيليا (2 جرام)
طريقة التحضير
- هنحط السكر و الزبدة على بعض و نضرب بالمضرب الكهربا أو السلك العادي لحد ما يبقى لون الزبده فاتح و السكر قرب يختفي
- بعد كدا هنضيف بيضة و احنا بنضرب لحد ما تختفى نضيف التانيه بعد كدا نضيف ظرفين فانيليا ونضرب و بس كدا منضربش كتير بعد ما نضيف البيض
- بعد كدا في بوله هنضيف الدقيق و البيكنج باودر و الملح و نقلبهم سوى بعد كدا نأخذ من الخليط دا شويه بشويه و ننزله على خليط الزبدة لحد ما يبقى عندنا عجينه متماسكه ناعمه و مش مشققه ممكن تأخذ الدقيق كله وممكن لا انا معايا مش خدت المقدار كله بس استخدمته هعرفكو ازاي
- بعد ما العجينه بقت كويسه و ماسكه من غير ما يبقى فيها تشققات و فاكه من بعض هنشكلها رول و نحطها في كيس و ندخلها الثلاجه لمده ساعة أو الفريزر لمده من ربع لتلت ساعة تمسك نفسها كمان
- بعد المده هنطلعها نأخذ تلتينها و نسيب التلت اللي فاضل في الثلاجه
- هنجيب صينيه مقاس 30 لو هتستخدمي صينية تارت و تعملي أحرف كدا هتحطيها في مقاس 28 هتدهني الصينيه زيت بعد كدا تحطي العجينه التلتين في نص الصينيه و تفرديها بالراحه في الصينية و تحاولي تفرديها كويس بحيث مش يكون في مكان في عجين اكتر من مكان لا ساويه كويس بعد ما تخلصي هتجيبي شوكه و خرميها كويس عشان متعلاش اوي عشان البيكنج باودر اللي فيها
- بعد كدا هاتي مربى أي نوع تحبيه انا حطيت 300 جرام يعني ثلث علبه الصفيح حطيها في طبق و اضربيها كويس بالشوكه عشان تبقي سائلة كدا مش تقيله و وزعيها كويس في الصينية فوق العجينة
- بعد كدا هتاخدي من الدقيق اللي فضل و ترشي على الرخامه و هتجيبي التلت اللي في الثلاجه اللي فضل من العجين وتحطيه على الرخامه و ترشي عليه دقيق تاني من فوق و تفردي بالنشابه و تقطعي بقي الأشكال اللي انتي عايزاها انا عملت وردة ممكن تعملي شرايط و تحطيها في الصينية و بعد كدا هتشغلي الفرن على 170 يسخن عبال ما تخلصي
- هتجيبي صفار بيضة عليه شوية فانيليا و بفرشاه و تدهني الأشكال اللي فوق بعد كدا هتدخليها الفرن على الرف الوسطاني مش تفتحي عليها قبل ربع ساعة زي الكيكه كدا و بعدين انا قعدت معايا حوالي 25 دقيقه و بعد كدا شغلت عليها الشوايه ممكن تأخذ معاكي وقت أطول يعني نص ساعة أو أقل على حسب شده الفرن بتاعك المهم اول ما تحسي أن الأطراف لونت حلو شغلي الشوايه
- ممكن برضو بدل الأشكال اللي هتشكليها تجيبي ثلث العجينه دا و تبشريه وهو مجمد كدا فوق العجين و مش تدهنيه بيض وبالهنا 😘❤
عجبتك الوصفة؟
شوف كل وصفاتنا في مكان واحد
كل الوصفات →
شوف كل وصفاتنا في مكان واحد