→ كل الوصفات
#مريولي_باسمي #جوز_الهند #حليب_بودرة اللهم صلّ وسلّـم علـى سيدنـا محمـد، حبيـت نشــارك معاكــم اليـوم ضمن مريولي بإسمي بسبوسة بالكريمة بذوق جوز الهند 🥥، وصفة سهلة وسريعة وبزاف بزاف 😋👌🏻 بنينة وخاصــة لمحبــي جوز 🥥 الهند أكيد رايحة تعجبهم بزاف، أمسية سعيدة أحبتــــي💐💖💐.
المقادير
- 02 حبات بيض
- رشة ملح
- كاس إلا ربع سكر
- ملعقة صغيرة مركز عطر (مزيج بين الفاني والزبدة)
- علبة يارورت ذوق الفانيلا سعته 100 ملل
- كاس زيت
- كاس جوز الهند
- كاس سميد رطب
- كاس إلا ربع سميد متوسط
- ملعقة صغيرة خمارة كيميائية
- 1 ملعقة كبيرة خل أو عصير الليمون
- 2 كيسان ماء
- كاس سكر
- 2 قطع من الليمون
- 250 ملل ماء
- 2 ملاعق كبار حليب بودرة
- ½ كاس سكر
- ½ كاس جوز الهند
- 1 ملعقة كبيرة نشاء
- ملعقة صغيرة فاني
- ¼ ملعقة صغيرة مركز عطر جوز الهند
- كمية من جوز الهند المكرمل
- حبيبات الشكولاتة الصغيرة على شكل قلب
طريقة التحضير
- نوجد كل المكونات ونبدأ على بركة الله، ندهن القالب بالسمن ونرشو بجوز الهند ونخليه بجيه، في إناء نحط البيض والسكر ورشة الملح والعطر (مزيج بين فاني وزبدة يمد ذوق رائع) نخلط الكل بالفوي (الضراب اليدوي). ملاحظة مهمة: ✔الكاس اللي كيلت بيه جميع المقادير في هاد الوصفة سعته 160 ملل
- ثم نضيف الزيت بالتدريج مع التحريك المستمر ثم نضيفاليارورت (الزبادي) بالتدريج مع الخفق دائما حتى تنسجم المكونات
- ثم نضيف جوز الهند خلطت الكل جيدا ثمّ نضيف السميد الرطب غربلتو بطبيعة الحال
- في الأخير نضيف السميد المتوسط خدات معايا كاس إلا ربع ما ستعملتش الكاس كامل، ثم نضيف خمارة الحلويات
- ونخلط شوية ونضيف عليها ملعقة كبيرة خل فوق الخمارة ونحرك الكل جيدا حتى تتجانس كل المكونات
- نفرغ الخليط في القالب نخبطو شوية مع سطح العمل، ندخل القالب للفرن المسخن مسبقا على درجة حرارة متوسطة من 25 دقيقة إلى غاية 30 دقيقة تقريبا. كي طيب نخرجها من الفرن ونخليها تهدأ شوية
- في هاذ الوقت نوجد الشاربات في كاسرونة حطيت الماء والسكر خلطت حتى ذات السكر وضفت طرونش ليمون وحطيتها فوق النار تكون متوسطة مدة 15 دقيقة بعد الغليان، وطفيت عليه. فرغت الشاربات وهي سخونة فوق البسبوسة كانت عندي دافية وشربتها مليح (داتلي كل كمية الشاربات) وخليتها بجيه. ملاحظة مهمة: ✔ الكاس اللي عبرت بيه مكونات الشاربات سعته 200 ملل
- نروح نوجد الكريمة، في كاسرونة نحط الحليب (250 ملل ماء + 2 ملاعق كبار حليب بودرة) والنشاء والسكر وجوز الهند نخلط بارد في بارد
- نحطها فوق النار مع التحريك المستمر حتى تعقد وتثقال معانا، نضيف عليها الفانيلا وعطر مركز جوز الهند، نخلط مليح حتى تنسجم المكونات، نحرك ونطفي عليها. ملاحظة: ✔الكاس اللي عبرت بيه سعته 160 ملل
- نقلب البسبوسة في صحن التقديم تكون تشربت كامل الشاربات وبردت تماما، نفرغ الكريمة وهي ساخنة في الفراغ اللي في الوسط، نحاول نسوي سطح البسبوسة جيدا ونخليها تبرد مليح فوق سطح العمل بلا ما ندخلها للثلاجة
- زينتها بالقليل من جوز الهند المكرمل صاير داير كنت 👈🏻حطيت من قبل الطريقة يمكن تفقد الوصفة من خلال هذا الرابط👇🏻، وفي الوسط حطيت قطع الشكولاتة الصغيرة على شكل قلب كما هو موضح في الصور
- وها هي واجدة تجي من أروع ما يكون👌🏻🥥👌🏻
- وقدمتها بألف صحة وهنــــا 🥥😋🥥
- جات بزاف بنينة😋🥥😋ومشربة 👌🏻🥥 وشهية طيبة للجميع🥰
عجبتك الوصفة؟
شوف كل وصفاتنا في مكان واحد
كل الوصفات →
شوف كل وصفاتنا في مكان واحد