→ كل الوصفات

بسكوت الشاي في 10 دقائق بدون زبدة ولا بيض ولا لبن 🤩

هنعمل النهارده احلى بسكوت اقطصادي جداً وطعمه خرااافي بجد تحفه، انا عملته بنكهة البرتقال ( فانيليا بطعم البرتقال ) ، لكن ممكن تحطوا فانيليا ساده عادي، مقرمش جداً ، تاكلوا بقى جمب كبايه شاي كده هيبقى يجنن 😂 ملحوظه: الكميةالانا عملاها قليله يعني كان اكتر من ضعف الفى الصوره بشويه، تقدروا تضعفوا الكميه .

  • 1/4 كوب زيت
  • 1/4 كوب سكر عادي
  • 1/4 كوب ماء
  • رشه ملح
  • معلقه نشا (مش لازم)
  • من كوب دقيق الي 2 كوب (لغايه لما يتعجن)
  • معلقه صغيره بيكنج بودر
  • فانيليا عاديه او فانيليا بالبرتقال
  1. يلا بسم الله نبدأ مع بعض، هنحط الزيت وبعده السكر والماء ونقلب كويس لغايه لما يتجانسوا مع بعض، و تقدروا تعملوا الخطوه دى في الخلاط
  2. هنحط بعدهم فانيليا عاديه او بطعم البرتقال، دى بالبرتقال وزي ما انتوا شايفين كده ده لونها وريحتها برتقال وبجد جميله اوي
  3. بعدها هنحط المكونات الجافه مع بعض (دقيق + نشا + ملح + بيكنج بودر) و ممكن نستغني عن النشا بس هو بيدي هشاشه، المهم هنقلب المكونات الجافه مع بعض ونضيف شويه على المكونات الفى الطبق ونقلب وبعدها نحط كل الكميةو نعجن، و لو احتجتوا دقيق حطوا، المهم انكم توصلوا لعجينه
  4. الحصل عندي هنا يجماعه ان انا بعد ما حطيت كبايه الدقيق كان ده المنظر وكان الدقيق خلص 😂 ، بس عادي اتصرفت واشتريت دقيق وكملت، عقبال ما اشتري دقيق حطيتها في التلاجه وده كان مخليها متماسكه اكتر
  5. هحط شويه دقيق على الرخامه علشان لما افرد متلزقش في الرخامه وتبقى حاجه ما يعلم بيها الا ربنا 😂
  6. هفرد العجينة، وانا عن نفسى قطعتها بالقطاعه، ممكن تقطعوها بالسكينه وتخلوا شكلها مربع، ممكن تقطعوها ب اي حاجه عندكم او اي شكل، المهم يكون سمك رفيع ومش لازم تدهنوا الصينية ب حاجه لو المنيوم
  7. و نسخن الفرن كويس
  8. خلي بالكم علشان بتستوي بسرعه اوعوا تنسوها، بألف هنا ⁦💙
عجبتك الوصفة؟
شوف كل وصفاتنا في مكان واحد
كل الوصفات →