→ كل الوصفات
وصفة سهلة جدا وخفيفه و مميزة هتعجبكم جدا بإذن الله❤️ #اخترت_لك #معجنات #بيتزا
المقادير
- 1 ك دقيق
- كيس نيدو حليب بودرة صغيرة (25 جرام)
- بيضه
- كوب زبادي صغير (105 جرام)
- 2 م ك خميرة
- 2 م ك سكر
- 1/2 م ص ملح
- زيت (قصاد كل كوب دقيق معلقه كبيرة زيت)
- ماء دافي كافي (إننا نلم العجينه)
- صوص بيتزا (حسب عدد صواني وحسب رغبتك)
- قطع صغيرة بصلة متوسطة مقطع
- 1 فلفل اخضر رومي مقطع قطع صغيرة
- 4 صدور دجاج مقطع مكعبات صغيرة
- فلفل ألوان (أخضر - أحمر - أصفر) مقطع شرائح طولية
- كوب مشروم شرائح
- ملح وفلفل اسود حسب الرغبة
- م ص بهارات فراخ (وصفة عندي ع صفحتي)
- كميه جبنة موزاريلا وشيدر مبشورين حسب الرغبه
طريقة التحضير
- ملحوظة ١ : قبل ما ادخل ف الوصفة لو معندكيش صوص بيتزا جاهز تقدري تعمليه ف بيت هتلاقي عندي وصفتين وصفه صلصة بيتزا هت الأصلي وصوص بيتزا الإيطالي
- نيجي بقى للعجينه اول حاجه هندوب خميرة وسكر ف كوب ماء دافي ونسيبها تتفاعل
- نجيب بولة ونحط الدقيق وحليب بودرة والخميرة بعد ماتفاعلت وبيضه وملح وزبادي و زيت (بالنسبة للزيت هتشوفي مقدار كيلو دقيق عمل اد ايه يعني مثلا لو كيلو دقيق ٧ كوبيات يبقى هتحطي ٧ م ك زيت وهكذا) ونخلطهم مع بعض وننزل بالماء الدافي بالتدريج ونعجن لحد ما العجينه تتلم وتبقى متماسكه
- بعد ماتتماسك العجينه تعجني حوالي ١٠ دقايق لحد ماتبقى ملساء تماماً
- هتحطيها ف بولة وتغطيها بفوطه وتسيبها تتخمر
- وع جنب هنتبل فراخ بالملح والفلفل وبهارات الفراخ
- هنجيب حلة صغيره فيها زيت وهنحط البصل المقطع صغير واول لما يدبل هنحط فلفل الاخضر المقطع قطع صغيره وهنقلب دقيقه ونحط الفراخ المتبلة ونقلب عليهم لحد ما الفراخ تستوي ونقفل عليها
- هنجيب صواني بيتزا المدهونه زيت هنقسم العجينه الى كور متساوية و حسب انتي عايزة كام صينيه
- بعد ماتفردي العجينه حطي صلصة بيتزا ووزعيها كويس ع العجينه بكميه اللي تحبيها وبعدين رشي جبنه شيدر وبعدين حطي حشوة الفراخ و وزعي باقي خضار المتقطع حواليها (فلفل الاحمر والاصفر والاخضر المقطع شرايح طولية و المشروم)
- وبعدين تدخليها الفرن ساخن مسبقاً وتسيبها تستوي وبعد ماتستوي هتطلعيها وتوزعي جبنه موزاريلا من فوق وبعدين تدخل الفرن ونفتح الشواية علشان جبنه تسيح والعجينه تاخد لون وبعدين نطلعها ونقطعها وبألف هنا ♥️
- ملحوظة ٢ : تقدري لما تفردي العجينه ف صينيه تخرميها بالشوكه بشكل عشوائي علشان العجينه ماتنفش لو انتي بتحبي العجينه الرفيعه لو بتحبيها سميكه مش هتعملي الخطوة دي
- ملحوظة ٣ : تقدري تقسمي العجينه بعد ماتتخمر وتفرغي الهوا منها وتعملي صينيه واحده وتاخدي الباقي تكوريهم وتحطيهم في كيس وشيليهم ف الفريرز ووقت ماتحبي تستخدميهم استخدميهم بس لما تطلعيها وتفك ابقي اعجينها دقيقه كده وتسيبها ترتاح ٥ : ١٠ دقايق وبعدين افرديها ف صينيه
- ملحوظة ٤ : تقدري لما تفردي عجينه في صينيه تسيبها ترتاح ١٠ دقايق وبعدين تبدأي تحطي الحشوة
عجبتك الوصفة؟
شوف كل وصفاتنا في مكان واحد
كل الوصفات →
شوف كل وصفاتنا في مكان واحد