→ كل الوصفات
كيتوجينك مفيش جلوتين يعنى مفيش دقيق ...البديل دقيق لوز او دقيق جوز الهند لكن الوصفة انا عملتها بالكوسة و مرة بالقرنبيط.عجبتنى الكوسة اكتر.بس تقدرى تعمليها بدقيق اللوز عادي بس كدا هتبقى مكلفة الطريقتين هنا
المقادير
- شرايح كوسة مقطعة
- زيت زيتون
- زبدة
- لحمة مفرومة
- زيتون ألوان (اسود و أخضر مقطع شرايح)
- بصلة و ثوم مفروم(بلاش البودرة كربوهيدرات اعلى و مش مفيد)
- طماطم صلصة في البيت بدون اضافات
- ملح و فلفل و خل تفاح
- جبنة رومي و موزاريلا و شيدر
- (دقيق لوز و بيضه و ملعقة زيت زيتون و خميرة و ماء دافىء)
طريقة التحضير
- الكوسة في صينية في الفرن عليها زيت الزيتون عشر دقائق لحد ما تحسيها بقت طرية
- تطلعى الصينية من الفرن و تسيبيها تبرد و ترشى حبة ملح وفلفل صغيرين عليها
- الصلصة على النار مع ملح بفلفل مع ملعقة خل تفاح و عدد ٢ فص ثوم متقطع صغير
- في طاسة تحطى الزبدة والفلفل و الطماطم الشرايح و الزيتون الشرايح و البصل و الثوم مع بعض ياخدوا وقت على النار و عليهم رشة ملح بفلفل
- اللحمة المفرومة لو هتعصجيها بصلة مبشورة و ثوم و ملح بفلفل
- دلوقتى الكوسة في الصينية رشي ميكس جبن فوقيها و بعدين اللحمة و بعدين صلصة البيتزا و بعدين الاضافات (اللي في الطاسة الزيتون و الفلفل)و بعدين جبنة كمان على الوجه
- في الفرن لحد ما الجبنة تسيح.كدا كدا الكوسة كانت في الزيت و شبه مستوية و برضه اللحمة المفرومة
- بالهنا على قلبكم.طعمها جميل
- لو عاوزين نعملها بدقيق اللوز كباية الدقيق عليها خميرة بيرة و ملعقة زيت و رشة ملح و ملعقة كريمة طهى و نعجن بماء فاتر لحد ما تلم و نسيبها تختمر و تحطيها في الصينية و تحطى الصلصة و الاضافات و الجبنة على الوجه و الفرن لحد ما تستوي.بالهنا
- لما تعملى الكمية.اعملى على قد الوجبة و بس عشان مناكلش الصينية كلها 😂... يعنى اعملى ٢ كوسة.و صينية صغيرة....و ماتقوليش هحطها في الثلاجة و أكل بكراااا عشان مبيحصلش...🤣
- نلتقى مع وصفة اخرى
عجبتك الوصفة؟
شوف كل وصفاتنا في مكان واحد
كل الوصفات →
شوف كل وصفاتنا في مكان واحد