→ كل الوصفات
طريقة عمل بيكاتا بالمشروم وفراخ او لحمة سهلة ولذيذة. اكتشفوا الوصفة الاصلية المضبوطة بالخطوات مع مكونات بسيطة وطريقة تحضير سهلة وسريعة.
المقادير
- 1 كيلو فراخ بانيه لو بيكاتا فراخ / 1 كيلو لحمة بفتيك (ولازم البفتيك عشان محدش يقول علينا حاجه 😂)لو بيكاتا لحمة
- 2 فص ثوم صحيح لشوي البروتين (لحمة او فراخ)
- عود روزماري أخضر لو موجود ويمكن الإستغناء عنه
- زيت زيتون
- 1 ملعقه كبيره زبدة
- 1 عبوه كريمة طهي 200 مل
- 2 ونصف كوب لبن
- 1 ملعقه دقيق مش مليانه
- 1 مكعب مرقه خضار
- 1 بصلة متوسطة الحجم مفرومة
- 2 فص ثوم مفرومين
- 2 ملعقه زيت زيتون
- عود كرفس اخضر متقطع قطع صغيرة
- 1 بصل اخضر متقطع قطع صغيرة بالشواشي الخضرا
- مشروم
- ملح حسب الرغبة
- فلفل أسود
- رشه قرفة للكريمه
طريقة التحضير
- بنغسل البانيه كويس بالميا والخل وبعدين نحطه في مصفى يجف … لو لحمة (في ناس بتحب تغسل اللحمة وناس بتقول غلط فحسب العاده لو اتغسلت بنسبها في مصفى تجف لو مغسلنهاش بنجيب منديل بنمشي على الشرايح نجففها) وهي في المصفى بنرش عليها ملح وفلفل اسود للتتبيل ونقلب الشرايح في بعض بايدينا عشان التمليح يوصل للشرايح كلها
- نجيب طاسه كبيره وغويطه ونحط فيها زيت الزيتون وقطعه زبدة عشان تدي طعم بس (عايزه زبدة بس /عايزه زيت بس دا أختياري) وفصين الثوم وياسلام لو في روزماري اخضر بنحط عود بس انا مكنش عندي فمحطتش (بس بيدي طعم وريحه تحفه 😋)
- بنسخن الطاسه وبعدين ننزل بشرايح الفراخ او البفتيك تأخذ الصدمه على حراره عاليه على الجنبين وبعدين بنقلل الحراره عشان البروتين يلحق يستوي من غير ما يتحرق
- بنفضل نقلب كل شويه عشان مفيش جنب يتحرق لحد ما ندوس على الشريحه ونلاقي الشوكه بتغرس ونعرف انها استوت ونطلعها نحطها في طبق على جنب ومنتكش اوي في السوا عشان متنشفش وكمان عشان لسه هنحطها في الكريمة وكده كده هتكمل سوا
- هنستخدم نفس الطاسه زي ما هي من غير ما نغسل حاجه هنشيل بس فصين الثوم من مطرح الشوي ولو حاطين روزماري نشيل العود ونرميهم وبعدين نزود في الطاسه على الزيت الي موجود مطرح الشوي (مطرح الشوي هيدي نكهه جميله للكريمه)نزود شويه زيت زيتون وننزل بالبصل والثوم المفرومين
- هنشوح الثوم والبصل لحد ما يصفروا
- وبعدين هننزل عليهم بمعلقه الدقيق ومتبقاش مليانه ونقلبها كويس لحد ما الدقيق يمتزج كويس
- ننزل عليهم بعبوه كريمة الطهي ونقلبهم لحد ما يمتزجوا
- بننزل على الكريمة ب كوبين ونصف او كوبين فقط من اللبن كامل او خالي الدسم حسب الرغبة وبعدين بنضيف مرقه خضار و فلفل اسود ورشه قرفة وندوق التمليح وبعدين نملح حسب الرغبة ومننساش ان الفراخ متملحه في الأول ونسيب الكريمة تغلي وبعدين ننزل بالفراخ المشويه او البفتيك المشوي ولو في اي صوص نزل من البروتين بنحطه بردوا على الكريمة … ونسيبهم يغلوا مع بعض حبه
- في الوقت دا بنكون قطعنا الكرفس والبصل الأخضر وبعدين نضيفه على الطبخه (ولو في مشروم طبعاً بنضيف شرايح المشروم (الفطر) لان دا اساس الأكله بيكاتا بالمشروم بس انا مكنش عندي 😁)
- وبعد ما نسبهم يستوي مع بعض ٥ دقائق كده على نار هادئة مع التقليب عشان الكريمة متتحرقش نقفل عليها وتقدم ساخنه وبالهنا والشفا
- انا بقدمها مع الرز الأبيض والسوتيه: لعمل الرز (كميةالرز حسب الرغبة للأكله دي من ٢ كوب ل ٣ كوب حسب العدد).. بنغسل الرز وبنجيب حله نحط فيها زيت زيتون ونضيف نصف كميةالرز نقلبه في الزيت ويأخذ تشويحه على النار وبعدين نضيف باقي الكميةوبعدين نضيف الماء (لو في شوربهً بنضيف شوربهً لو مفيش شوربة بنضيف ماء ومكعبه مرقه خضار و ورقه لورا هتبقى بديل كويس للشوربة)
- هنضيف مرقه الخضار و ورقه اللورا زي ما قلت فوق (بنضيف ماء او شوربهً قد ايه : لكل كوب ارز كوب ونصف ماء او شوربة). وبعدين نضيف ملح وفلفل اسود حسب الرغبة
- بنسيبه على نار عاليه لحد الغليان ولما الماء تقل على الرز زي ما موضح في الصوره بنخفف النار خالص ونقلب الرز كويس عشان ميبقاش في حاجه لازقه ونغطي ونسيب الرز يتشرب (لو النار الهادئه عندك مش هادئة اوي بنحط صاجه او شياطه تحت الحله) وبعد ٥ دقائق بندوق رزايه كده بنشوف استوت ولا لسه لو لسه بنسيبه حبةكمان… بعد شويه لو لسه محصول يبقى محطتيش شوربهً او ماء بكميه كافيه بنضيف رشة ميه او شوربة ونسيبه يتشرب تاني (بس نتاكد انه محصول عشان ميعجنش لو زودنا ماء)
- بالنسبه للسوتيه بنختار نوع الخضار المفضل (انا بستخدم جهاز بخار Braun)… بحط الخضار وبحط الماء في الجهاز وبشغله قبل مابداء الأكل في الاول خالص وبظبطه على ساعة لحد ما اخلص اكل يكون السوتيه استوى (انا عن نفسي برش عليه رشة ملح وكمون وطبعا دا أختياري)
- وبألف هنا وشفا ويارب تعجبكم❤️
عجبتك الوصفة؟
شوف كل وصفاتنا في مكان واحد
كل الوصفات →
شوف كل وصفاتنا في مكان واحد