→ كل الوصفات
محتاجين الفترة دي نشتغل شوية علي تجهيزات رمضان عشان طبعا بيبقي الوقت ضيق جدا في رمضان ،، من اكتر الحاجات اللي بحتاج فعلا اخزنها هي الثوم بالذات وطريقته سهلة اوي ، هقولك علي الطريقة المفضلة ليا وافكار لاضافت نكهات مختلفة ليه ان شاء الله تعجبك 😉
المقادير
- كيلو ثوم ويفضل البلدي
- 6 م ك زيت عادي او زيتون
- م ص ممسوحة ملح
- فلفل احمر او اخضر حار
- زنجبيل فريش
- زعتر جاف او فريش
طريقة التحضير
- بجيب الثوم وبقشره وبغسله كويس ،
- بعدين في الكبة افرمه مع الزيت والملح ، انا بفضل افرمه ناعم لو بتحبيه فرم خشن براحتك ،
- طرق للحفظ : ١/ احفظيه في برطمان وضعيه في الفريزر ،، او ٢ / ادهني مكعبات الثلج بقليل من الزيت وضعيه في الفريزر يتجمد وممكن بعد ما يتجمد تفكي المكعبات وتضعيها في كيس تخزين وتستخدميها وقت الحاجة ،، او ٣ / احفظيها في كيس تخزين علي طول بس افرديه فيها كدة علي شكل مربع ،،
- افكار اضافات للثوم : ١/ اضافة فلفل اخضر واحمر حار مع نفس المكونات السابقة وتفرميهم مع بعض وبتستخدم في تتبيلة السمك ،، ٢ / اضافة زنجبيل فريش مع باقي المكونات السابقة وتفرميهم مع بعض وبتستخدم في تتبيلة اللحوم والفراخ ،، ٣ / اضافة زعتر جاف وفريش ويفرم مع المكونات السابقة وبتستخدميه في شرايح العيش الإيطالي بالزبدة والثوم والزعتر او صلصة البيتزا الخ ،،
- دي افكار مختلفة للثوم يعني في موسم الثوم ممكن تجيبي كمية كبيرة نص الثوم و تفرميهم بكذا طعم مختلف وبالف هنا 🙂
عجبتك الوصفة؟
شوف كل وصفاتنا في مكان واحد
كل الوصفات →
شوف كل وصفاتنا في مكان واحد