→ كل الوصفات
#المريول_الذهبي اللهم صلّ وسلّم وبارك علـى سيّدنا محمد، حبيت نشـارك معاكــم اليـوم ضمــن تحدي المريول الذهبــي، حساء العدس الأحمر بالطريقة التركية المغذي قدمتو مع شرائح الخبز المقرمش والمحمص، يجـي ولا أروع 👌🏻 خفيف ومشبع وبزاف 😋👍🏻😋بــنين، نتمنـــى تعجبكــم الطريقــة، جمعة مباركة على الجميع 💖🌷💖
المقادير
- كأس ونصف عدس أحمر
- 2 ملاعق كبار زيت
- حبة بصل متوسطة مقطعة شرائح
- حبة جزر مقطعة قطع صغيرة
- حبة بطاطا متوسطة مقطعة قطع صغيرة
- حبة طماطم متوسطة منقية من القشرة ومقطعة قطع صغيرة
- 3 فصوص ثوم
- 1 ملعقة كبيرة طماطم مصبرة
- التوابل نحتاج
- ملح حسب الذوق
- ¼ ملعقة صغيرة فلفل اسود
- ½ ملعقة صغيرة كركم
- 1 مكعب مرق الخروف
- ملعقة صغيرة فلفلة حمرة (بابريكا)
- حوالي لترا ونص ماء غالي (ساخن لدرجة الغليان)
- 1 ملعقة صغيرة زبدة
- عند التقديم نحتاج
- رشة كمون
- رشة فلفل أحمر (بابريكا)
- شرائح الخبز المحمص
طريقة التحضير
- نبدأ على بركة الله، نحضّر الخضر اللي نحتاجهم في الوصفة نقيهم ونقطعهم، في طنجرة نفرغ شوية زيت ونرمي عليها البصلة نخليها شوية تتقلى ثم نضيف الثوم
- ثم نضيف الطماطم المصبرة نقليها مليح على نار متوسطة ثم نضيف الجزر حتى هي نقليها شوية
- ثم نضيف البطاطا نقلّيها كذلك وفي الأخير نضيف الطماطم والتوابل (الملح، الفلفل الأسود، الفلفلة حمرة، الكركم، مكعب المرق الخروف)، نغلق على الطنجرة ونقص شوية على النار ونخليها تتقلى مليح وهذا سر من أسرار البنة
- في هاذ الوقت نغسل جيدا العدس من الأتربة والشوائب حتى يصبح الماء نقي (أنا غسلتو خمس مرات)
- صفيتو وخليتو يستقطر شوية وضفتو على الخضر
- قلّيتو شوية مع الخضر باش يتشرب البنة ونمرّق بالماء يكون ساخن جدا نحرك الكل ونغلق على الطنجرة ونخليه يطهى على نار متوسطة مدة 35 دقيقة
- كي يطيب ينقص شوية الماء، نطفي عليه
- نخليه شوية يهدا مدة 5 دقائق ونميكسيه بالبرا ميكسور حتى نتحصل على قوام سلس إذا حسيتوه ثقيل بزاف ممكن نضيفو كاس ماء ساخن لكن أنا اكتفيت بالماء اللي ضفتو في الأول والقوام جاني هو هذاك
- وهو عاد ساخن ضفت الزبدة وخلطت جيدا وقمت بسكبه في غرفية التقديم
- كنت حمّصت شرائح الخبز الطريقة موجودة بالتفصيل يمكن 👈🏻تفقد الوصفة من خلال هذا الرابط 👇🏻
- وقدّمتو بألف صحة وهنا مع شرائح الخبز المحمص والمقرمش بنّة عالمية😋👌🏻😋 ، دردرت من فوق القليل من الكمون والقليل من الفلفلة حمرة (بابريكا) رشات خفيفة فقط وشهيـة طيبة
عجبتك الوصفة؟
شوف كل وصفاتنا في مكان واحد
كل الوصفات →
شوف كل وصفاتنا في مكان واحد