→ كل الوصفات

حلى بارد بالجوز الهند (دايت)🥥

حلى بتبدأ بحرف الحاء و ده حرف بابا حبيبي ماتحرمش منه ابدا❤️ سعراته مش عاليه اوي و في نفس الوقت بدهون صحيه علشان ماتبقيش ملغبطة اوي واهو من نفسك علشان ماتحرميش نفسك من حلويات بردو ممكن مره في الشهر كله تاخدي طبق ك وجبة الفري بتاعتك بدل ماتعملي وجبة غداء فري تاخديها هي و الوصفة دي عرفت أفكارها من خبيرة تغذية ..هتعجبكم جداً بإذن الله ❤️

  • 1/2 كوب جوز الهند مبشور(جزء متحمص وجزء هنسيبه زي ماهو ابيض)
  • 1/4 كوب زيت جوز الهند
  • 1/4 كوب ماء
  • 1/4 كوب كاكاو
  • 2 ملعقة ص فانيليا سائله
  • علبة قشطة 100 جرام
  • سكر دايت او عسل (حسب الرغبة والخطوة دي اختياري)
  1. ملحوظة قبل ما نبدأ في الوصفة : اختاري نوع الكاكاو كويس وبلاش كاكاو الغامق لانه بيكون مر جداً
  2. نبدأ في الوصفة : اخدت جزء من جوز الهند المبشور و حمصته على نار متوسطه لحد مابقى لونه ذهبي (هو لونه ذهبي غامق بس مش باين في صورة وخدي بالك وانتي بتحمصيه علشان مايتحرقش منك)
  3. وهنجيب ١/٤ كوب ماء هنحطه عليه نقطتين فانيليا وننزل بيهم بعد كده في بولة و نحط عليه الكاكاو و بعدين نحط سكر او عسل (لو عاملة كيتو دايت حطي سكر ستيفيا من لو مش عامله دايت او عاملة دايت عادي ممكن تحطي عسل او دبس تمر) وبعدين انزل بزيت جوز الهند و بعدين اخلطهم مع بعض واجيب الهاند بلندر او خلاط واضرب الخليط لحد ما يتقل معايا ويبقى زي جناش شوكولاته و ادخلها ثلاجة تبرد شويه هتلاقيه تقل شوية وطعمه زي شوكولاته المدوبة بالظبط حلو ماشاء الله
  4. وفي بولة تانيه هحط القشطه و رشة فانيليا واقلب دقيقتين تديني قوام كريمي كده (في ناس بتحب تحط هنا بردو سكر او عسل بس انا مش عايزاها تبقى مليانه سكريات بس براحتك طبعاً بس ماتكتريش علشان تبقى مناسبه للدايت بتاعك وماتبقاش لغبطة جامدة)
  5. وجبت كاسات تقديم وحطيت طبقه من جوز الهند المبشور الابيض و عليه المتحمص وبعدين حطيت طبقه يعتبر ملعقة كبيره من خليط القشطة بالفانيليا و بعدين نزلت بخليط الكاكاو اللي حطيته في ثلاجة و حطيت ملعقة صغيرة خالص من خليط القشطه تاني وزينتها بالجوز الهند المبشور و قطعه شوكولاته دارك (وكده كده تقدري تقدمي الوصفة بشكل اللي تحبيه) وحطيه في ثلاجة يبرد شوية وبألف هنا ❤️
عجبتك الوصفة؟
شوف كل وصفاتنا في مكان واحد
كل الوصفات →