→ كل الوصفات
#عروسة_جديدة الحمام من الوصفات التقليدية المميزة في المطبخ المصري و بيتميز بحلاوة طعمة وسهولة تنفيذة وغالبا بيقي ضمن عشا العروسة او فطار الصباحية.. جربوة بطريقة أمي هتدعولنا والله من جمالة واحلى من اي مطعم ♥️💪 هكتب مقدار جوز حمام واللي يزود يضاعف الكمية 👌
المقادير
- 2 عدد حمام مغسول ومتنضف كويس جدا
- 1 كوب أرز مصري مغسول ومتصفي
- 1 بصلة مفرومة
- 2 م ك زيت نباتي
- 1 م ص ملح
- 1/2 م ص فلفل اسمر
- 1/4 م ص حبهان بودر
- 1/4 م ص سكر
- الشوربة المميزة بتاعة الحمام👇
- مقدار كافي من الماء
- 1 بصلة كبيرة مفرومة او 2 وسط
- 3 ورق لورا
- 3 فص حبهان
- 2 فص مستكة
- ملح حسب الرغبة
- 1/2 م ص فلفل اسمر
- 1/2 م ص سكر
طريقة التحضير
- بسم الله اللهم صل وسلم على نبينا محمد وعلى آله وصحبه أجمعين وسلم تسليما كثيرا إلى يوم الدين ❤️
- نغسل الرز ونصفية كويس
- نفرك البصل المفروم كويس الأول بالفلفل الاسمر والملح والحبهان والسكر ثم نضيفة للرز ونضيف الزيت ليهم ونقلب الخليط
- نحشي الحمام من عند الرقبة ونوسع بصباعنا براحة تحت الجلد عشان ميفرقعش مني ونحشي حبة صغيرين عشان الرز لسة هينفش مني ونحشي البطن كذلك ولازم تكون مش مكبوسة رز عشان الرز يستوي كويس وميعجنش من برة ويبقى ناشف ومش مستوى من جوة 😉 وممكن نحط الكبدة والقوانص بتاعتهم معاهم جواها بس انا بعمل بيهم رز بالخلطة يتقدم جنبة 😋
- في حلة على النار لما الماية تغلى نضيف ليها التوابل بتاعة الشوربة والبصل المفروم ونسقط فيها الحمام وبعد الغليان نوطي ونغطي من ٤٥ ل ٥٠ دقيقة
- نشيلة ونصفية في مصفى ولما يهدي من الحرارة نبدأ في التحمير كالتالي 👈 في طاسة على النار نحط كمية مناسبة من الزيت ونحمر الحمام ودي طريقة أمي التقليدية 😉.. في طريقة تانية للتحمير وهي سر من أسرار المطاعم 👌👌 إضافة معلقة سمنة لزيت التحمير ودهن الحمام بشوية لبن بالفرشاة الأول ثم تحميرة في الزيت والسمنة الخطوة دي بتدي للحمام لون وردي دهبي موحد زي اللي بيتقدم في المطاعم بالظبط 👌
- جربوة بطريقتي وطريقة امي يارب يعجبكم وربنا يتمم بالف خير لكل العرايس الحلوين 👰👰👰
- أخيرا اللهم أغفر لجدتي وارحمها واسكنها فسيح جناتك يارب العالمين 🤲
عجبتك الوصفة؟
شوف كل وصفاتنا في مكان واحد
كل الوصفات →
شوف كل وصفاتنا في مكان واحد