→ كل الوصفات

حمام محشى تحفة

ده حمام امى و جدتى الشهير حتاكلوا صوابعكم وراه 😀😀

  • 6 حمام
  • كوب الا ربع رز مصري مغسول
  • 1 بصلة صغيرة مفرومة
  • 1 حبة طماطم مبشورة منزوعة القشر
  • 1 مكعب ماجى
  • كسبرة و بقدونس مفرومين
  • ملح
  • فلفل
  • بشر جوزة الطيب
  • للتحمير
  • زيت غزير
  • ملعقة سمن
  • ملعقة صلصة طماطم
  • فلفل اسمر
  1. تنضفى الحمام كويس بالملح و قليل من الخل و الدقيق من الداخل و الخارج و تسيبيه فى مصفاة يتصفى كويس
  2. أهم حاجة فى مكونات الحشوة (غير الرز طبعا 😊) هى الكبد و القوانص طبعا بعد مايتغسلوا كويس.. القوانص و القلوب لازم يتسلقوا فمقدار قليل من الماء و معاهم نص بصلة و ملح و فلفل و بعد ما يقربوا يستووا ضيفي الكبده و تتقلب معاهم دقيقتين مش اكتر و تطفى النار عشان متتهريش
  3. حتنشلى القوانص و القلوب من شوربتهم و تضربيهم فالكبة لفة او لفتين بس.. اما الكبدة فحتقطعيها بالسكينة قطع متوسطة و تضيفيها للقوانص و القلوب
  4. الحشو : حتجيبي البصلة المفرومة و تدعكيها كويس بالبهارات المذكورة و مكعب ماجى دوبيه فربع كوب ماء دافىء و تضيفى الطماطم المبشورة + القوانص و القلوب و الكبدة + الخضرة المفرومة و تضيفي كل ده للرز المغسول و تقلبي كويس و حسب راحتك ياما تضيفى معلقة سمن للخليط او معلقتين زيت ذرة او عباد
  5. الحمام بيتحشي بين الجلد و اللحم ده الأساس.. فلازم تفصلى الجلد من اللحم باحتراس شديد حتى لا ينقطع الجلد و ممكن تزودى معلقة او معلقة و نص بالكتير داخل تجويف البطن.. متكتريش فالحشو عشان الرز يستوى كويس و كمان عشان ما يتقطعش الجلد معاكى اثناء الطهى و الافضل ان تركيز الحشو يكون فالمساحة اللى تحت جلد الرقبة لأن الجلد فيها سميك صعب اوى يتقطع غير جلد البطن بيبقي رقيق اوى
  6. بعد ما تنتهى عملية الحشو فيه ناس بتقفل الحمامة من تحت بالرأس بتاعتها و بعدين تجيب الرجلين كروس على بعض ، و فيه ناس بتقفل بخلة سنان
  7. تسلقى الحمام فى ماء مغلى يكون مغطي الحمام للنص على الاقل و تضعى فماء السلق بصلة صغيرة و ملح و فلفل و ورقة لاورى و قرنفل و حبهان و عود قرفة (مش لازم كل ده طبعا اللى عندك حطيه 😄) اهم حاجة فى سلق الحمام ، بعد المية ما تغلى توطى النار خالص اكنك بتطبخى رز عشان الحمام جلده مايفتحش
  8. يختبر نضج الحمام بغرس شوكة فى مفصل الذراع و تلويه للخلف لو اتلوى معاكى بسهولة يبقي استوى (عموما مش بياخد اكتر من 45 دقيقة على النار)
  9. تحمير الحمام : طبق غويط حطى فيه معلقة السمنة السايحة + معلقة الصلصة + شوية فلفل اسود + رشة شطة(اختياري طبعا) و قلبي الخليط كويس و بعدين قلبي الحمامة فالخليط ده من كل ناحية و تكونى محضرة الزيت الغزير الساخن أكنك حتحمري بطاطس و اسقطى الحمامة فيه مفيش ثوانى و حتلاقيها احمرت بالشكل اللى فالصورة من جميع الجوانب و بألف هنا و شفا 😄
عجبتك الوصفة؟
شوف كل وصفاتنا في مكان واحد
كل الوصفات →