→ كل الوصفات

حمام محشي رز

طريقة عمل حمام محشي رز سهلة ولذيذة. اكتشفوا الوصفة الاصلية المضبوطة بالخطوات مع مكونات بسيطة وطريقة تحضير سهلة وسريعة.

  • كبشه يد ارز لكل حمامه
  • كبد وقوانص حمام وفراخ
  • بصله مفرومه
  • ملح
  • فلفل
  • صلصه
  • ليمونه
  • زيت
  • حبهان
  • لورا
  • مستكه
  • سمنة
  1. بشوح البصله المفرومه ومعاها الحبهان واللورا شويه وبعدين انزل بالكبد والقوانص المتقطعه وطبعا بتاعت الحمام بتبقي صغيرة فبزود بكبد وقوانص الفراخ واضيف ملح وفلفل وافضل اشوحهم حبه حلوين واخفف عليهم 10 دقائق
  2. بكون غاسله الرز كويس ونقعاه بتاع ساعة كدا بصفيه واضيفه على الكبد والقوانص واشوحة معاهم شويه وباكون غاليه ربع كوب ماء بضيفها على الرز واغطي لحد مايشربهم
  3. اسيب الرز يبرد واجيب الحمام وطبعا بيكون مغسول كويس جداااا واتاكد ان كله متسلك كويس ومش مخروم واول مالرز يهدي ابتدي احشي من تحت الجلد بتاع الصدر واحشي الحمامه من جواها واجى من عند الرقبه واحشيها وطبعا مش بملاها على اخرها علشان الرز لسه هاينفش حبه كمان لانه استوى نص سوى وهاجي من عند الرجل واكتفها واقفلها بخله سنان ومن عند الرقبه برده بخله سنان
  4. اكون غاليه ماء وحاطه فيها لورا وحبها ومستكه وملح وفلفل وبصله وطماطمايه وقبل مانزل بالحمام هاجي بخله السنان واخرم ضهر الحمامه 3 اخرام صغننه نغزه بسيطه كدا علشان لما احطها في الماء المغليه اسمح للهوا انه يخرج ومتفرقعش الحمامه وتطلع الرز الى جواها واسيبه يتسلق من ساعة الا ربع لساعه
  5. اولع الشوايه الى في الفرن واسيب الفرن يسخن وفي بوله احط كيس صلصة او معلقتين واعصر ليمونه وملح وفلفل وشويه زيت واقلبهم حلو مع بعض واجي بقي على كل حمامه وادهنها بالفرشه وجهها وضهرها واحطها في صينيه تيڤال واكون داهنه الصينيه بطبقه خفيفه سمنه وارص الحمام وادخله الفرن واتابعه لما وشه يحمر اطلعه اقلبه على الوجه التاني بمجرد مايحمر ومش هاياخد وقت خالص اطفي عليه واطلعه اغطيه بفوييل خمسه بس علشان ماينشفش وبألف هنا وشفا على قلبكم
عجبتك الوصفة؟
شوف كل وصفاتنا في مكان واحد
كل الوصفات →