→ كل الوصفات
طريقة عمل حمام محشي سهلة ولذيذة. اكتشفوا الوصفة الاصلية المضبوطة بالخطوات مع مكونات بسيطة وطريقة تحضير سهلة وسريعة.
المقادير
- جوز حمام
- مقدار كف الايد رز لكل حمامة..ننقع الرز قبلها بنص ساعة
- بصلة متوسطة مبشورة
- م ص ملح
- م ص فلفل
- رشة قرفة
- م ك زبدة
- 3 حبهان
- فص مستكة صغير
- 3 ورق لوري.. للشوربة
- عصير طماطماية
- رشة ملح وفلفل للتحمير
طريقة التحضير
- نغسل الحمام و نفصل الجلد بصوابعنا كويس نبدا من عند الورك وندخل السبابة براحة لغاية ما نفصل الجلد عن الصدر عشان يبقي فيه مكان للحشو
- نحط معلقة الزبدة و نشوح فيها البصلة لغاية ما تدبل و ننزل عليهم بكبدة الحمام و ناخدها تقليبة معاهم
- ننزل بالرز و نقلب كويس عشان يتفلفل..و نضيف الملح والفلفل و رشة القرفة..نحط مقدار فنجان ماية و نسيبه لغاية ما الرز يبقي نص سوا و يشرب الماية و بعد كده نرفعه من عن النار و نسيبه يبرد
- ندخل الرز جوا الحمام براحة عشان الجلد ميتقطعش و لازم الحمامة متبقاش مليانة رز كتير عشان متفرقعش..ونحط اخر حاجة القناصة و نقفل عليها..ولو مش هنعرف نقفلها من تحت ممكن نضم الرجلين علي بعض و نربطها بخيط ويتشال قبل التحمير
- ننزل الحمام فالمياة المغلية و معاه الحبهان وورق اللوري و فص المستكة ولازم يكون صدر الحمامة لتحت عشان متفرقعش و نسيبهم حوالي ٤٥ د و نضيف الملح للشوربة و رشة فلفل نسيبهم ٥د و نرفعهم مالشوربة
- ندهن الحمام بعصير الطماطم و نحمره فمعلقتين سمنة كبار و بالهنا والشفا
عجبتك الوصفة؟
شوف كل وصفاتنا في مكان واحد
كل الوصفات →
شوف كل وصفاتنا في مكان واحد