→ كل الوصفات

حواوشي

طريقة عمل حواوشي سهلة ولذيذة. اكتشفوا الوصفة الاصلية المضبوطة بالخطوات مع مكونات بسيطة وطريقة تحضير سهلة وسريعة.

  • 0.5 كيلو لحمة مفرومة
  • 4 بصلات متوسطة
  • 6 قرون فلفل اخضر
  • فص ثوم
  • 2 معلقة ملح صغيرة
  • رشة فلفل اسود
  • ملعقة صغيرة بهارات حواوشي
  • معلقتين كبار زبدة سايحة او قطعة لية ضاني (يفضل تتفرم مع اللحمة)
  • خمس ارغفة عيش بلدي او عيش حواوشي
  1. نفرم البصل والثوم في الكبة ونقطع الفلفل قطع صغيرة ونحطهم على اللحمة
  2. ملحوظة: كمية اللحمة دي عملت معايا خمس ارغفة من العيش البلدي العادي يعني ١٠ انصاف من العيش (عيش بلدي عادي كبير مش عيش الحواوشي الصغير)
  3. نضيف الملح والتوابل والفلفل الاسود ومعلقتين الزبدة او لو معانا لية ضاني وما فرمناهاش مع اللحمة بنبشرها او نخرطها صغير اوي على اللحمة المفرومة
  4. بنعجن كل ده في بعضه كويس اوي لحد ما يختلط كله مع بعض كويس ونسيبه في الثلاجة مش اقل من ساعة
  5. نحشي العيش بالحشو وندهن وجه العيش وقعره بعد الحشو بقليل من الزبدة ونرصه في صينية او صاج فرن يكون مدهون زبدة برضه وندخله الفرن على حرارة ١٨٠ او ٢٠٠ بياخد حوالي من ساعة الا ربع لساعة بس
  6. بعد ما بيفوت نص الوقت بنقلبه على الوجه التاني وممكن نشغله الشواية في الاخر لو كان ملونش كويس
  7. لو بتفضلوا الحواوشى طري وانا بفضله كده نغطي الحواوشي وهو في الفرن بورق فويل او نغطي الصينية نفسها بغطا او صينية تانية او ممكن اول ما نطفي عليه نحطه في حلة او طبق ونغطيه هيبقي طري لو بتفضلوه ناشف نسيبه من غير تغطية. بألف هنا 🌺
عجبتك الوصفة؟
شوف كل وصفاتنا في مكان واحد
كل الوصفات →