→ كل الوصفات
#chicken_mushroom_with_rice_vegetable_potato
المقادير
- 1 كيلو سفاين مسحبة
- زبدة (انا بستخدم لوربك)
- زيت زيتون
- ملح ، بهار اسود ، بهار دجاج
- مكعب ماجي دجاج
- كريمة الطبخ (انا بستخدم كريمة بوك 1 ليتر)
- جبنة موزيرلا
- 2 فطر مقطع علب او طازج (طازج اكيد اطيب)
- بصلة مفروم صغير ناعم
- 2 سن توم
- ملعقين طحين
- كباية ماء او زيادة حسب الحاجة
- خضار على ذوقك ( انا بحط كوسا و جزر و ذرة و بروكلي و بازيلا
- ٣/٤ كباية رز مصري
- 6 حبة بطاطا حجم صغير
طريقة التحضير
- اول خطوة اكيد من بعد تنظيف الدجاج ، منشرح السفاين قطع رفيعة و منشكهم بالشوكة حتي يستوي اسرع من بعدها مننقع الدجاج بالملح و البهار الاسود و بهار الدجاج شي ١٠ دقائق
- منقلي الدجاج بمقلاية منحط فيها معلقتين زبدة كبار و ملعقة زيت زيتون (اذا احتجنا نرجع نزيد زبدة شوي منزيد حسب الدجاج اذا اخدهم كلهم و بعد في دجاج للقلي) منخلص قليهم و منشيلهم بصينية على جنب
- منجيب نفس المقلاية (اذا كانت غميقة و بتساع منيح) و اذا لا منجيب طنجرة، منحط كمان ملعقة زبدة و ملعقة زيت زيتون و منقلي البصلة تكون مفرومة صغير كتير ناعم منقليها لتدبل ما بدنا ياها تحترق ولا تحمر ولا تشقر
- منقشير ٢ حبة ثوم و منحطهم فوق البصلة منقليهم معها من دون ما نفرمهم هيك حط و منرجع منشيلهم
- بس تدبل البصلة منزيد الفطر و منتبلهم سوا منحط رشتين ملح و رشة بهار اسود و مكعب الماجي
- منزيد ملعقتين الطحين و كباية الماء و منحرك منيح
- منرجع منزيد شوي من كريمة الطبخ و منحرك ، من بعدها منجيب الدجاج يلي قلينهم و منزيدهم فوقهم و منصير منزيد كريمة الطبخ شوي شوي و منحرك
- بس يبلش يغلي منزيد فوقهم جبنة الموزيرلا و منحرك و هيك بتكون خلصت
- الخضار منغسلهم منيح و منصلقهم اول شي الجزر منحطو شي ٥ دقائق و من بعدها منزيد البروكلي فوقهم كمان شي ٥ دقائق ومنزيد الباقي شي ٥ دقائق و بخلصو
- البطاطا منغسلهم منيح و منقص هيك شق منشقه للحبة و منحطهم بالفرن ١٨٠ درجة بياخدو وقت شي ٤٠ دقيقة
- الرز منغسله منيح و كل كباية رز بدها كبايتن ماء (انا اسخدمت ٣/٤ كباية يعني كباية و نص ماء) منحطهم على النار مع نص ملعقة صغيرة ملح ، ١٠ دقائق و بخلصو و صحة و هناء
عجبتك الوصفة؟
شوف كل وصفاتنا في مكان واحد
كل الوصفات →
شوف كل وصفاتنا في مكان واحد