→ كل الوصفات

سلطة طحينة بطعم لذيذ

بعد التجريب والتخريب توصلت لطريقة غريبة بس لذيذة بإذن الله تنافس احسن المطاعم

  • 1 كوب سمسم محمص
  • 0.25 كوب زيت دوار الشمس
  • رغيف عيش شامى منقوع في ماء أو لبن حليب
  • 0.5 كوب عصير برتقال
  • ملعقة صغيرة سكر
  • 2 ملعقة صغيرة خل طبيعى
  • 0.25 ملعقة صغيرة توم بودر
  • فصين توم مفروم
  • 0.25 كوب شبت مفروم ناعم
  • ملح وفلفل حسب التذوق
  • رشة كمون ناعم
  • زبادي (اختيارى)
  1. اطحنى السمسم في كبة التوابل وبعدين انقليه في دورق الخلاط وضيفى معاه الزيت واضربيه كويس اوى لحد ماينعم
  2. ثم اعصرى العيش وضيفيه على خليط السمسم واضربيه لحد ما المكونات تمتزج
  3. هاتى طاسة وارفعى الخليط ده على النار المتوسطة مع التقليب المستمر هتلاحظى ان الخليط ابتدا يتقل ضيفى عليه من اللبن او الماء الى كان منقوع فيها العيش بس مش كتير علشان لسه عندنا اضافات سائلة تانية
  4. افضلى قلبى وضيفى التوم والتوم البودر والملح والسكر والخل وقلبى على النار وضيفى عصير البرتقال
  5. دلوقتى ارفعيه من على النار وضيفى الشبت ورشة الكمون ولو عاوزة تضيفى الزبادي طبعا هي اضافة عظيمة بس الى مش عاوز مايحطهاش
  6. الطريقة يمكن تبان غريبة بس لو جربتوا المكونات دى في ملعقة طحينة صدقونى فعلا هتحبوها وبراحتكم عاوزين الطعم مسكر سنة او حادق تقدروا تتحكموا فيه وكمان تقدروا تتحكموا في القوام لو عاوزينه تقيل او سائل
  7. انما المكونات الى انا كتبتهالهم دى هتحسسكم ان الطحينة طعمها حلو انما مش مسكر وبألف هنا وشفا
عجبتك الوصفة؟
شوف كل وصفاتنا في مكان واحد
كل الوصفات →