→ كل الوصفات
#كأس_العالم_للطبخ 💪 ⚽🏆 اللهم صلّ وسلّم وبارك على سيدنا محمد، حبيت نشارك معاكم اليـوم سمـك الصوريــر مقلي، يسمى في بعض المناطق الجزائرية الخورير وفي المناطق العربيـــة (الشرن) أمـا بالفرنسيـة يدعى chinchard 🐟 يجي بزاف بزاف بنين 😋👌🏻😋، وبما أن الوصفة حطيتها ضمن تحدي كاس العالم كل التحية لأهلنا في المغرب الشقيق بمناسبة تأهل فريقهم الوطني للنصف النهائي، مزيدا من الإنجـازات والإنتصــارات ما بقــاش على الكاس إلى خطوات بسيطة نتمنى التوفيق والسداد إن شاء الله، أمسية سعيدة أحبتــي 💐
المقادير
- كيلو سمك الصورير
- 4 فصوص ثوم مقطع رقيق
- 1 ملعقة كبيرة معدنوس مقطع رقيق
- 1 ملعقة كبيرة قصبر مقطع رقيق
- التوابل نحتاج
- الملح حسب الذوق
- ملعقة صغيرة فلفلة حمرة (بابريكا)
- ملعقة صغيرة كمون
- ½ ملعقة صغيرة كركم
- ¼ ملعقة صغيرة فلفل أسود
- ¼ ملعقة صغيرة سكين جبير
- 2 ملاعق كبار سميد رطب
- زيت للقلي
طريقة التحضير
- نبدأ على بركة الله، نقي سمك الصورير كنت 👈🏻حطيت الطريقة بالتفصيل ممكن تفدها من خلال هذا الرابط 👇🏻
- نحط الصورير في إناء بعد ما استقطر من الماء نضيف عليه التوابل المذكورة أعلاه (الملح، الفلفل الأسود، الكركم، الكمون، الفلفلة حمرة، سكين جبير) والمعدنوس والقصبر من الأحسن يكونو مقطعين رقيق مع الثوم نخلط الكل جيدا نغطي على الإناء ونحطو في الثلاجة مدة نصف ساعة باش تتشرب التتبيلة جيدا
- ثم نضيف السميد رطب فوق السمك ونقلب جيدا حتى تتلبس كل الحبات من كل الجهات بالسميد نصيحة: ✨إضافة السميد بدلا من الفرينة يعطيه قرمشة رائعة
- نحط القليل من الزيت في مقلاة يسخن ونحط عليه الصورير نقليه من الجهتين والحبة اللي توجد نحطها فوق ورق ماص
- أما التتبيلة اللي تبقى في الإناء المخلطة مع السميد نضيف عليها قطرات من الماء ونلمها وندير كريات وحتى هي نقليها من الجهتين. ملاحظة: ✔هاذ الطريقة كانت أمي ربي يرحمها ديرهالنا كي تقلي السمك بالسميد الرطب الباقي في الإناء ما ترميهش تعاود تلمو بالماء وتقليه يجي بزاف بنين
- وقدّمتو بألف صحة وهنا 😋😋🐟😋😋
عجبتك الوصفة؟
شوف كل وصفاتنا في مكان واحد
كل الوصفات →
شوف كل وصفاتنا في مكان واحد