→ كل الوصفات
#وصفات_بالارز انا كان نفسى ادوق السوشى جداً وجوزى طلبه من مطعم وكان عباره عن 15 قطعه ب ٥٠٠ جنيه وكان معظمه خضار انا قررت انى اعمله في البيت باقل التكاليف وفعلا طلع حلو جداً ونضيف وعاملاه على زوقى
المقادير
- 3 ورقات ورق نورى
- اصابع كابوريا
- 150 جم سلمون مدخن
- 7 وحدات جمبري
- ثمرة افوكادومقطع شرايح رفيعه بالطول
- ثمرة خيار مقطع طولى بدون بذر القشر بس يعنى
- جزره مقطعة شرايح رفيعه بالطول
- 3 ملعقه من خل الارز
- ملعقه سكر
- ¼ م ملح
- كوب من الارز المصري
طريقة التحضير
- اول حاجه بنحضر الارز بنغسل الأرز جيداً اكتر من مره لحد لما الماء تكون رايقه عشان نشيل أكبر قدر من النشا
- نحط الارز في حله وعليها كوب ماء واول ما يغلى أهدى النار واسيبه ربع ساعة بدون ما اشيل الغطا بعدها اطفى النار واسيبه 10 دقائق برده من غير ما اشيل الغطا
- احضر الخل واحط عليه السكر والملح واضيفهم الارز وهو سخن
- بعد كده أفرد ورق النورى على ورق فويل واحط عليه حوالي 3 ملاعق رز وافردهم طبقه غير سميكه واضع اصابع الكابوريا بالطول و معاها شرايح الخيار والجزر والف الرول زي السويسرول بالظبط وبعدها امسح على طرف الورقه بالماء واقفل وكده يبقى عندي اول رول اقطعه بسكين حامي حلقات
- ثاني رول بلى ايدك في ماء بزيت وهنحط الرز الأول بره 3 معالق نفردهم ونحط عليهم ورقة نورى وعليها الجمبري ويكون مقلى او مسلوق ومعاه شرايح الافوكادو و الجزر ونلف الرول نفس الطريقه إللى فاتت وبعد كده نحط عيه شرايح السلمون المدخن من بره نفردها على الرول وتلفيه في استرتش وبعد شويه قطعيه برده بسكين حامي وهو في الاسترتش
- الرول التالت زي التاني هنحط الرز بره وبعد كده ورق النورى ونحط باقي السلمون وصباع من الكابوريا وشرايح خيار وجزر وافوكادو ونلف كويس وده هنعمله فرايد سوشى مش هنحط حاجه من بره احنا هنحطه في خليط من الدقيق والبيض زي بتاع الفيليه ونقليه في زيت سخن وتطلعه نستنى يبرد ونقطعه
- كل رول هيعمل حوالي 10 قطع مش هيتكلف معاكى كتير و هيبقى اطعم من بره وممكن تلعبى في الألوان براحتك ممكن تحطى جزر او خيار بس ممكن اي واحد فيهم لوحده انتى ومزاجك وممكن لو عندك سبيط (حبار) او سمك تونه فريش تحطى انتى وامكانيات والهنا والشفا
عجبتك الوصفة؟
شوف كل وصفاتنا في مكان واحد
كل الوصفات →
شوف كل وصفاتنا في مكان واحد