→ كل الوصفات
الشاورما من الأكلات اللذيذة جداً وبتتعمل بكذا طريقة وأنا عملتها بالطريقة المصرية بتتبيلة سهلة ولذيذة😋 وبتتقدم في عيش البرجر ومعاها سلطة الطحينة🤩 بجد من أحلى وصفات الشاورما إللى ممكن تجربيها👌🏻😍
المقادير
- 1/2 كيلو لحمة مقطعة شرائح رفيعة
- 1/4 كوب خل
- 1 بصلة كبيرة مبشورة
- 1/2 ملعقة صغيرة سكر
- 1 ملعقة صغيره ملح
- 1 ملعقة صغيره فلفل أسود
- 1 ملعقة صغيره بهارات لحمة
- 1 ملعقة صغيره بابريكا
- 1/2 ملعقة صغيرة قرفة
- 1 بصلة كبيرة مقطعة شرائح
- 2 فلفل رومي مقطع شرائح
- 2 طماطم مقطعة شرائح
- كمية من سلطة الطحينة
- عيش برجر
طريقة التحضير
- أولاً جيبي طبق غويط وحوطي فية اللحمة وضيفي عليها بعد كدة البصلة المبشورة والخل والملح والفلفل والسكر والقرفة والبابريكا وبهارات اللحمة وقلبيهم مع بعض كويس وبعد كدة غطي الطبق وسيبي الشاورما في التتبيلة لمدة ساعتين ممكن تعمليها من بليل بتكون أحسن كل لما سبتيها في التتبيلة بتكون أفضل 😍
- جيبى مقلاية وحوطيها على النار وحوطي فيها 3 ملاعق من الزيت وبعد لما المقلاية تسخن ضيفي الشاورما وقلبيها حبة وسيبيها لحد لما تتشرب السوائل بعد كدة ضيفي عليها 1/2 كوب ماء ساخن وقلبيها وغطي المقلاية بعد كدة وهدي النار على الشاورما وسيبيها لحد لما تتشرب السوائل مرة تانية وتستوي😍
- بعد لما الشاورما اتشربت كل السوائل ضيفي عليها البصل الشرائح والفلفل الرومي الشرائح والطماطم بس شيلي بذور الطماطم عشان متنزلش سوائل تاني وقلبيهم مع الشاورما لمدة دقيقة وبعد كدة أقفلي النار عليها😍
- جيبى بئا عيش البرجر وحوطي فية طحينة وبعد كدة الشاورما وحوطي طحينة تاني من فوق اتحكمي في نسبة الطحينة حسب ذوقك واعملي معاها بطاطس محمرة وقدميها مع مخلل بجد وهمية جبارة 🤩 جربيها بنفسك وشوفي العظمة والجمال😍❤️
- 😋😋😋😋😋😋
عجبتك الوصفة؟
شوف كل وصفاتنا في مكان واحد
كل الوصفات →
شوف كل وصفاتنا في مكان واحد