→ كل الوصفات
شوربة العدس حلوة اوي في الشتاء وبتدفى وكلها غذاء اتمنى تعجبكم
المقادير
- 500 جرام عدس اصفر
- 3 حبات بصل كبيرةمقطعة ارباع
- 4 حبات طماطم كبيرة مقطعة ارباع
- 4 حبات جزر كبيرة مقطعة شرائح سميكة
- ملعقة كبيرة ثوم مفروم
- ملعقة كبيرة صلصة طماطم
- ملعقة كبيرة كمون صحيح
- ½ كوب شعيرية
- ملح حسب الذوق
- فلفل حسب الذوق
- ½ كوب زيت او يفضل 2 ملعقة كبيرة سمنة بلدي
- ماء لسلق المكونات
- ملعقة سكر
طريقة التحضير
- هتغسلى العدس كويس وتنقيه لو فيه اي شوايب او حصى وتحطى عليه الطماطم وبصلة واحدة كبيرة والثوم كله على قلب بعضه وسيبيهم يغلوا على نار عالية في الاول ولما يغلوا خلى النار هادية
- هتتابعى الحلة بالتقليب المستمر علشان العدس بينفش بسرعة وممكن يتلسع من تحت
- هتفضلى تقلبى تقلبى لحد ما المكونات تحسى انها استوت تماما خصوصا الجزر ومايغركيش ان العدس بيبان عليه انه استوى بسرعة بس طعمه بيكون نى فخليهم براحتهم
- ايوة كده
- وكده كمان
- في طاسة تانية تكون كبيرة حطى الزيت او السمنة وحطى البصلتين الباقيين بس تكونى مقطعاهم زي بصل الكشري وخليهم يتحمروا شوية
- وبعدين حطى عليهم الشعيرية وسيبيهم يتحمروا
- ايوة كده اخدوا اللون البنى الجميل بس ما تزوديش علشان مايمررش
- حطى عليهم شوية ماء بقى وسيبيهم يستووا سوى سوى
- هنرجع ثاني لحلة العدس لما تكون استوت وكله تمام هتضربيها بالهاندبلندر او بالخلاط كويس اوي ومفيش داعى انك تصفيها هي كلها ألياف ومفيدة جداً
- هنا بقى ابدئي ضيفي صلصة الطماطم والملح والكمون الحصى والبصل والشعرية وتقلبى تقلبتين وتقدميها لعيلتك بألف هنا وشفا
- في ناس مش بيضيفوا البصل والشعرية وبيضيفوا طشة ثوم وفي ناس بيضيفوا سمنة بلدي بس من غير طشة الثوم خالص وناس بتحط حتى زيت حار واهو كله اذواق بس بالنسبة لى دى طريقة والدتى ومش بستطعم العدس الا بطريقتها
عجبتك الوصفة؟
شوف كل وصفاتنا في مكان واحد
كل الوصفات →
شوف كل وصفاتنا في مكان واحد