→ كل الوصفات
هقولك على تركات في الشوربة وهتقارنيها بأحسن مطاعم السمك وشوربتك هتكسب بإذن الله بس أرجو قراءة الملاحظات في اخر الوصفة بكل عناية.....على بركة الله نبدأ.
المقادير
- 0.25 كيلو جمبرى (اختيارى)
- 0.25 كيلو كابوريا (اختيارى)
- 0.25 كيلو بكلويز او بلح البحر (اختيارى)
- 0.25 كيلو (كاليمارى او سبيط) (اختيارى)
- 0.25 كيلو سمك (اساسى ومش اختيارى)
- حبة متوسطة من البصل الأحمر او الأبيض تكون مفرومة
- حبة متوسطة جزر تكون مبشورة
- ملعقة صغيرة ثوم مفروم
- 3 ملعقة لبن بودرة (اختيارى)
- 0.5 لتر لبن ونص لتر ماء..... او لتر ماء
- كريمة لبانى (اختيارى)
- 2 ملعقة ممسوحة ملح
- 0.25 ملعقة صغيرة فلفل اسود
- ملعقة صغيرة زعتر
- 0.25 ملعقة صغيرة كمون مطحون
طريقة التحضير
- كل مكونات السى فود اختيارى الا السمك فتقدرى بكل سهولة تعمليها بالسمك فقط ترشيدا للنفقات وبرده هتدوقى احلى شوربة سمك بس خدى بالك من التركات
- اول حاجة هتشوحى البصلة مع الجزرة في حلة على النار لحد ماتحسى ان الاتنين لونهم اصبح شفاف شوية ومش عاوزين اللون يتغير ولا يبقى ذهبي ولا بنى
- هترفعى البصلة والجزرة من على النار وتحطيهم في الخلاط مع نصف كوباية ماء او لبن اللى تحبيه وتضربيهم ضربا مبرحا لحد ماتلاقى انهم تحولوا لعصير
- دلوقتى هترجعيهم للحلة تانى وهتلاحظى ان العصير ده لونه ابيض حتى لو مش ضايفة عليه لبن دلوقتى ضيفى الثوم وسيبيه يغلى وممكن تزودى عليه كمان كباية ماء وكباية لبن وتسيبيهم يغلوا
- دلوقتى الشوربة دى غليت تمام ابدئي ضيفى عليها المكونات والزعتر وأول ماالشوربة دى تبتدى تغلى اطفى عليها النار وماتنتظريش انها تغلى غلوة حلوة والا السى فود هيتحول لكاوتش ومش هيعجبك خالص
- اطفى النار دلوقتى وبعدين ضيفى عليها اللبن البودر او الكريمة والملح والفلفل والكمون وقدميها لحبايبك بالهنا والشفا واقرأى الملاحظات اللى هكتبهالك بحرص وعناية علشان تشربى شوربة في حياتك مادوقتى زيها
- الملحوظات هي:- أحسن تركيبة للشوربة دى هي نص ماء ونص لبن او ماء ولبن بودرة بس لو هتضيفى اللبن البودرة يبقى تضيفيه في الاخر خالص وتكونى متأكدة ان الشوربة هتتاكل ومش هترجعى تسخنيها تانى علشان اللبن البودرة لو اتحط على النار هيتكتل ويبقى زى اللبن الرايب ومش هيبقى عاطفى ابدا
- الكريمة اللبانى مالهاش لازمة الا انها بتزود دسامة الشوربة بس فلو عاوزة تعمليها من غير كريمة خالص وهتطلع برده روعة وصحية جدا يبقى توكلى على الله
- الزعتر هي الإضافة الوهمية اللى هتنقلك الشوربة لحتة تانية خالص وبالنسبة للكمون لو هتضيفيه مطحون يبقى بكمية صغيرة جدا وبعد ماتطفى علشان مايمررش الشوربة اما لو صحيح فبرده ماتكتريش منه بس تقدرى تضيفيه مع الزعتر في الأول وكمان السى فود ماتكتريش الفلفل الأسود لان البحريات حساسة منه جدا واى زيادة عن الكمية الى كتبتها هتخلى الشوربة مشطشطة
- بالنسبة للسمك اختارى نوع يكون بيستحمل وفيه دهن علشان لحمه يكون متماسك وما يتهريش زى الوقار او قشر البياض بس لو ماعندكيش الا البلطى برده استخدميه بس خليكى حريصة
- هعيد تانى انك تحطى المكونات في الشوربة وأول ماتغلى يعنى احسبى دقيقتين من بدأ الغليان بالظبط اقفلى النار برده هتكمل التسوية بس كل المكونات هتبقى جوسى وناعمة ومش هتجلد
- قدميها لأحبابك بكل الحب وبالهنا والشفا لأى حد هيعملها
عجبتك الوصفة؟
شوف كل وصفاتنا في مكان واحد
كل الوصفات →
شوف كل وصفاتنا في مكان واحد