→ كل الوصفات
وصفة معروفة كل ولاية كيفاش يطيبوها .
المقادير
- قطعتين لحم ومن الأحسن يكون لحم خروف 🐑
- فنجان صغير حمص يكون ديجا منفخ (منقوع) من قبل و مفور يجي ساهل كي نطيبوه ماشي نبقوا نستنوا فيه يطيب
- عودين زعيترة
- 1 ورقة رند وشويا دبشة
- حبة بصل صغيرة مقطعة رقيق
- 5 سنات ثوم (ثلاثة في البداية) و اثنين نستعملوهم للدرسة
- 3 ملاعق كبار زيت نباتي
- ملعقة صغيرة من : توابل ملح ، فلفل أسود، فاح، فلفل أحمر حار، زعفران./ توابل الدرسة: كسبر، نصف حبة جامبو خروف(اختياري كاين الي مايستعملوش) /في الأخير رشة كمون (الكمون الأخضر دائما نزيدوه في الاخير)
- حبة طماطم متوسطة نرابيها
- كوب كبير (طاس) ماء ساخن نمرقوا بيه
- حبتين فلفل حار
- ملعقة كبيرة طماطم مصبرة
- كمية من الفريك عينك ميزانك ⚖️
طريقة التحضير
- نحط اللحم، الدبشة، الحمص، البصل،الثوم, زعيترة، الرند على نار قليلة نقلبهم جيدا
- نزيدلهم زيت ونقليهم ونغطي القدر نخلي البصل ياخذ اللون الذهبي واللحم يبدا في الاستواء
- نزيد التوابل المذكورة ونرابي عليهم حبة طماطم ونخليهم يتقلوا مليح
- نمرق بماء ساخن ونزيد طماطم المصبرة والفلفل و الدبشة
- لما يستوي اللحم نزيد الفريك ونقلبها ونخليها تستوي
- نزيد الدرسة (ثوم ودبشة + جامبو+ كسبر مهرسين)
- نضيف رشة كمون اخضر وكي نشوفها موايان ماهي جارية كيما الماء ماهي ثقيلة بزاف شغل ناشفة ونعرفها طابت ونغلق عليها
عجبتك الوصفة؟
شوف كل وصفاتنا في مكان واحد
كل الوصفات →
شوف كل وصفاتنا في مكان واحد