→ كل الوصفات
لما كنت مسافره مغتربه عن بيتى المطبخ بتاع الشقه كان فيه فعليا حله واحده و صينيه واحده و اربع اطباق و ده موقفش قدام رغبتنا في اكله صينيه معكرونه بالبشامل 😋😋😋😋😋
المقادير
- كيس نص كيلو معكرونه مقصوصه
- لتر لبن
- معلقتين كبار دقيق
- معلقتين كبار سمنه او زبدة
- 0.5 كيلو طماطم
- معلقه كبيرة صلصه
- 1/2 كيلو لحمه مفرومه
- 1 بصله كبيره
- ملح
- فلفل
- ورق لوري
- معلقه صغيره سكر
- 2 ملعقة زيت
طريقة التحضير
- هنجهز مايه سخنه فيها ملعقة زيت و معلقه صغيره جدا جدا ملح ونسيبها تغلى و نحط فيها المعكرونه نسلقها
- بعد ما المعكرونه تتسلق هنصفيها في طبق و في نفس الحله هنحط معلقه صغيره سمنه مع نص البصله ونسيبها تدبل خالص
- ننزل باللحمه على البصل و معلقه ممسوحه صغيره ملح و معلقه ممسوحه صغيره فلفل ونعصج اللحمه
- خدى بالك من المهم كل خطوه تحطى ملحها و فلفلها علشان الوصفه متكونش ناقصه حاجه
- بعد ما اللحمه تتعصج هنحطها في طبق و في نفس الحله هنحط معلقه زيت و نص البصله ونسيبها تتذبل مع معلقه فلفل صغيره ومعلقه ملح صغيره
- عقبال ما البصل يدبل نكون ضربنا الطماطم في الكبة ولو معندناش كبه ممكن نبشرها ونطحن معاها ورق لوري (تركيه حلوه هتديكي نكهة تجنن)
- ننزل بالطماطم على البصل و نقلب تقليبه حلوه و ننزل بمعلقتين الصلصه كمان ومعلقة السكر
- بعد ما نحس انها بدات تتمزج مع بعض هنحط شويه مايه ونقلب
- هنقسم الصلصه ٣ هناخد معلقتين كبار على طبق اللحمه و مغرفتين صلصه على طبق المعكرونه ونحط باقي الصلصه في طبق
- كده بقى عندنا تلت اطباق لحمه بالصلصه و معكرونه بالصلصه و صلصه
- هنجيب الحلة بعد ما شيلنا منها الصلصه وننزل بمعلقتين السمنه الكبار و معلقتين الدقيق ونسيبهم لغايه ما الدقيق يتحمر وطبعا ما ننساش الملح و الفلفل
- بعد ما الدقيق و السمنه يتجانسو جدا مع بعض هننزل بالتدريج باللبن و نفضل نقلب كتير وطبعا كل ده و النار مفتوحه
- كده بقى عندنا البشاميل هننزل عليه في الحله بطبق الصلصه لغايه ما البشاميل ياخد لون احمر
- فيه ناس بتحب البشاميل ابيض ساعتها هنقسم الصلصه بين اللحمه و المعكرونه و بس
- كده عندنا حله البشاميل و طبق المعكرونه و طبق اللحمه
- نجيب بقى صينيه ونقسم المعكرونه نصين و بينهم اللحمه و عليهم البشاميل
- وندخلها الفرن على درجه حراره متوسطه
- وبعدين نفتح الشوايه في الاخر علشان تحمر لنا الوش وتبقى يجنن
- ملحوظات حلوة😅: انا بحط الصلصه على اللحمه علشان تبقى طريه ومتنشفش في الفرن. ورق اللورى بيدى طعم يجنن في الصلصه
- وبالف هنا 😍
- نسخ الرابط تمّ نسخ الرابط
- البريد الإلكتروني
- بينترست
- اقرأ المزيد
- اطبع الوصفة اطبع الوصفة
- انسخ النصّ انسخ النصّ
- أبلغ عن الوصفة
- شاهد أخبار وصفتك
- احذف
عجبتك الوصفة؟
شوف كل وصفاتنا في مكان واحد
كل الوصفات →
شوف كل وصفاتنا في مكان واحد