→ كل الوصفات

طاجن البامية باللحمة والدُقة

من أشهر والذ الطاجن المصرية هي طاجن البامية باللحمة وخصوصا اللحمة الضاني.. مع إضافة لمسات بسيطة هتنقل الطاجن لحتة تانية خاااالص من اللذاذة والجمال جربوها بطريقتي يارب تعجبكم

  • 1/2 كيلو بامية فريش وممكن مجمدة
  • 1/2 كيلو لحمة ضاني او كندوز ويفضل الموزة مسلوقة 3/4 سلقة
  • 2 بصلة وسط أو 1 كبيرة
  • 8 فصوص ثوم
  • قرن فلفل حامي
  • 4 فلفل رومي صغير أو 2 وسط
  • حزمة كسبرة خضرة او م ص مجفف الكسبرة الخضرة
  • لمونة بدون قشر
  • 2 او 3 حبات طماطم وسط (حسب الحجم) مضروبين
  • 1 م ك صلصة جاهزة
  • 2 ورق لورا
  • كوب مرقة لحم
  • 1.5 م ص كسبرة ناشفة
  • 1/2 م ص فلفل اسمر
  • 1/2 م ص سكر
  • 1/4 م ص كمون
  • 1/2 لـ 1 م ص لية ضاني مبشورة
  • ملح حسب الرغبة
  1. بسم الله اللهم صل وسلم على نبينا محمد وعلى آله وصحبه أجمعين وسلم تسليما كثيرا إلى يوم الدين ❤️. نسلق اللحمة الضاني او الكندوز ٣/٤ سوا. في الطاجن الفخار نضع اللية تسيح مع معلقة زيت ومعلقة سمنة وممكن تكون لية بس او سمنة بس بس اللية بتدي طعم راااائع ومش بتبان نهائي نضيف البصل المبشور ونقلب ونخلية يدبل بس ويطري ونضيف معاة قرن فلفل حامي ورقتين اللورا ونقلب ورشة ملح ورشة سكر ونقلب
  2. في الكبة هنضع كل من الثوم والفلفل الرومي والفلفل الحار والليمونة ورشة ملح وفلفل ونضرب. نضيف الكسبرة الخضرة ونضرب ضربة واحدة ويفضل يكون الخليط خشن. بعد ما البصلة تدوب نضيف كل الخليط اللي في الكبة ما عدا معلقة كبيرة منة ونقلب لحد ما تظهر ريحتة ونضيف الكسبرة والكمون والفلفل الاسمر ونقلب. نضيف معلقة الصلصة تاخد صدمة ونقلب ثم نضيف البامية ونشوحها ونقلب
  3. نضيف عصير الطماطم ونكون مصفيينة من البذر ومجرد ما تاخد غلوة نضيف شوربة اللحمة ومعلقة دقة التوم اللي فاضلة معايا ونظبط الملح والفلفل ونضيف اللحمة ونغطية بفويل او غطاة وندخلة الفرن على أعلى حرارة عالرف الاقرب للارضية ربع ساعة ثم نشيل الغطا ونرفعة للرف اللي في الوسط لحد مايتسبك ويكمل سوا وياخد اللون التحفة دة 😋😋
  4. ملحوظة 🤓 اللية مش بيبان طعمها خالص.. يفضل اللحمة تكون ضاني.. الكسبرة الخضرة بتدي طعم رااائع لية.. الليمونة ممكن الاستغناء عنها بس بتمنع المادة الزلالية من انها تكتر او تزيد أثناء السوا وكذلك التشويح.. البامية لو متفرزة نشطفها بماية بس فورا من خروجها من الفريزر ونشوحها على طول منخليهاش تفك عشان متنزلش الزلال منها وتمخط
  5. أخيرا دعوة حلوة لجدتي (اللهم أغفر لجدتي وارحمها واسكنها فسيح جناتك يارب العالمين وأجعلها من أهل الفردوس الأعلى من الجنة ياااارب) 🤲 ❤️.. دي كانت اكتر اكلة جدتي الله يرحمها بتحبها 😢😢
عجبتك الوصفة؟
شوف كل وصفاتنا في مكان واحد
كل الوصفات →