→ كل الوصفات

طاجن المكرونة بالبشاميل 👌 😋

(اللهم صل على سيدنا محمد صلاة تنحل بها العقد وتنفك بها الكرب وتفتح لنا بها أبواب الفرج) 🌼 #أطباق_2020 وصفتي أنهاردة هي المكرونة البشاميل الأصلية بأجمل طعم ممكن تدوقية.. بشاميل مظبوط بفضل الله وكريمي وغني جدا 😋🍽️ مع أسرار وتكات المطاعم فيها هتخليكي محترفة بإذن الله ❤️ قدميها لعيلتك بالف هنا يارب 🌹

  • 400 جرام مكرونة
  • 250 جرام ل 300 جرام لحم عصاج نزلت وصفتة قبل كدة هنا
  • 3.5 كوب لبن
  • 1 كوب ماية سلق المكرونة
  • 1/4 لـ1/2 كوب كريمة لبناني
  • 4 م ك ذبدة
  • 3 م ك زيت
  • 4 م ك دقيق مليانة
  • 1/2 م ص ملح
  • 1/4 م ص فلفل ابيض او اسود
  • رشة بهارات لحمة او 7 بهارات
  • منكهات للبشاميل أختياري ورق لورا او كبابة صيني
  1. بسم الله اللهم صل وسلم على نبينا محمد وعلى آله وصحبه أجمعين وسلم تسليما كثيرا إلى يوم الدين ❤️
  2. نسلق المكرونة 3/4سوا ونظبط الملح بتاعها في السوا
  3. نصفيها ومنغسلهاش ودي خطوة مهمة لو عاوزينها تطلع متماسكة 😉
  4. نحضر البشاميل كالتالي 👈 في حلة نضع الزيت والذبدة وبمجرد ما الذبدة تدوب ننزل بالدقيق ونستمر في التقليب لحد ما الدقيق ياخد لون دهبي خفيف ويستوي عشان يبقى طعم البشاميل حلو ونضيف اللبن ونستمر في التقليب ثم ماء السلق ونضيف الملح والفلفل الأبيض ورشة بهارات اللحمة والسكر ونظبط الملح حسب الرغبة
  5. نضيف الكريمة ونقلب ونطفي متخليهاش تغلى عشان متفصلش وتخرز
  6. العصاج طريقتة هنا عالبيدج بتاعتي مميز وخطير 😋
  7. تجهيز الصينية 👈 نقلب اولا نص المكرونة اللي هيتحط في قاع الصينية مع جزء من البشاميل.. نضع شوية بشاميل في قاع الصينية ثم نص المكرونة ثم العصاج ونقلب بقية المكرونة بشوية بشاميل بردو ونضعها فوق العصاج ونضغط على المكرونة على خفيف ونضع بقية البشاميل على الوش وننزلة بالسكينة كدة عشان يتغلغل جواها 😋
  8. نرش على الوش بقسماط مطحون ورشة زيت
  9. ندخلها فرن حامي على ٢٢٠ ربع ساعة أو ٢٠ دقيقة ثم نفتح الشواية عليها ٥ دقايق عشان تاخد لون 😉 جربوها بطريقتي يارب تعجبكم ❤️
  10. ملحوظة 🤓 خطوة مهمة في عمل البشاميل ان الدقيق يبقى سايح وناعم في المادة الدهنية مش مخرز او مكلكع عشان كدة بنعملة بزبدة وزيت كتير شوية عشان يبقى كريمي اوي وناعم
  11. أخيرا اللهم أغفر لجدتي وارحمها واسكنها فسيح جناتك يارب العالمين 🤲 ❤️
عجبتك الوصفة؟
شوف كل وصفاتنا في مكان واحد
كل الوصفات →