→ كل الوصفات
طريقة عمل طاجن فراخ بالتتبيلة السحرية 🤩 سهلة ولذيذة. اكتشفوا الوصفة الاصلية المضبوطة بالخطوات مع مكونات بسيطة وطريقة تحضير سهلة وسريعة.
المقادير
- فرخة بيضة متقطعة
- بصلتين
- فص ثوم
- حبتين طماطم
- حبة فلفل اخضر حامي
- جزرة مبشورة
- معلقة كبيرة صلصة
- خل
- عسل نحل
- علبة زبادي
- كاتشب وصوص باربيكيو
- ملعقه صغيره ملح وبهارات
- ملعقة صغيرة فلفل اسمر
- حبهان ولورا
- مستكة وجوزة الطيب
- ملعقة صغيرة كاري
- رشة زعتر وروزماري
- قرفة
طريقة التحضير
- هنغسل الفرخة كويس بعد تقطيعها وننقعها شوية في خل وملح وليمون وحباية طماطم عشان تتشال منها زفارتها
- هنقطع البصل والطماطم وفص الثوم والجزرة المبشورة ونضيفهم على الفرخة بدون حباية الفلفل
- هنضيف ملعقة العسل وعلبة الزبادي ومعلقة الصلصة والكاتشب وصوص الباربيكيو
- هنقسم البهارات الجافة نصين بعد خلطهم على بعض الملح والفلفل الاسمر والحبهان واللورا وجوزة الطيب والمستكة والكاري ورشة الزعتر والروزماري والقرفة ونحط نص البهارات دي على الفراخ والتتبيلة وندعك الفراخ بالمكونات دي كويس جداً ويفضل نغزغز الفراخ بشوكة صغيرة عشان تشرب من التتبيلة ونحطها في الثلاجة لمدة من ٤ ساعات ليوم كامل
- بعد ما نخرج الفراخ من الثلاجة هننشلها من التتبيبلة ونحطها في طبق ونرش عليها النص التاني من البهارات الجافة ونصفي الماء من مكونات التتبيلة بتاعة الفراخ ونحط الماء دي في كباية
- في حلة على النار هنحط سمنة او زيت حسب الرغبة ونخلي الفراخ تأخذ صدمة من الجنبين وتحمر ونشيل الفراخ ونحط مكانها في نفس الحلة مكونات التتبيلة ونشوحها لمدة ٥ دقائق فقط وبعدها نرص الفراخ في الطاجن ونحط عليها التتبيلة ونرمي الفلفل المتقطع على وجهها ونحط عليها مقدار كباية من الماء اللي اتصفت من التتبيلة ونغطي الطاجن بورق فويل وندخله الفرن
- الفراخ هتستوي بسرعة جداً ومش هتاخد وقت ونقدر بعد ٣٠ دقيقة نشيل ورق الفويل عشان وجهها ياخذ لون
- أثناء تشويح الفراخ والتتبيله الريحة لن تقاوم وممكن تاكلوها وانتوا واقفين 😂 واللي حابب يعملها بطريقته او يعدل عليها عادي وبالهنا والشفا 😍
- ملحوظة تقدروا تضيفوا للطاجن ده اي خضار بتحبوه بطاطس مثلا او كوسة او بسلة (بازيلا)
عجبتك الوصفة؟
شوف كل وصفاتنا في مكان واحد
كل الوصفات →
شوف كل وصفاتنا في مكان واحد