→ كل الوصفات
اول مره اجرب احط الأنواع كلها مع بعض، واول مره اعمله في الطاجن و طلع لذيذ جداً ♥️ مع اني مش من محبي المحشي ولا بعرف اعمله اصلا 😂
المقادير
- كيلو الا ربع باذنجان
- ¼ كيلو ورق عنب
- ¼ كيلو فلفل
- 2 كوب ارز
- عصير 3 حبات طماطم
- 1 فلفل اخضر
- ربطه بقدونس / شبت / كزبرة
- بصلتين متوسطتين
- 2 فص ثوم
- ملعقة صغيرة ملح / فلفل
- كمون / بهارات
- 2 مكعب مرقه او كوبين شوربة
- معلقتين زيت
طريقة التحضير
- مده التحضير ساعة تقريبا،، و التسويه نص ساعة
- هحضر الباذنجان (اقوره😅) و ورق العنب (اسلقه واشيل البتاعه اللي تحت دي 😂) والفلفل (اشيل راسه بقى)
- اقطع بصله قطع صغيرة في الحله مع فصين الثوم و الملح و الفلفل والكمون و البهارات و ملعقة زيت و اقلبهم لحد ما يصفروا و ريحتهم تبقى باينه 😍
- انزل بعصير الطماطم على البصل و اسيبها تغلي 10 دقائق على نار هاديه
- اغسل الأرز كويس و اغسل الخضره و اقطعها حتت صغننه خالص عشان ما تضايقنيش في الحشو
- انزل بالارز على الصلصة و هي بتغلي و اقلب دقيقتين و اطفي النار و أضيف الخضره في الاخر
- احضر الخلطه و الخضار، و طاجن الحشو احط فيه ملعقة زيت و اقطع فيه بصله حلقات عشان مفيش حاجه تلزق و اقعد قدام التليفزيون احشيهم 😂😂😅
- اه صح! قبل ما اقعد احشي، هشغل الفرن على درجه 180 ل 200 تقريبا عشان يسخن.. و هحضر الشوربه، لو مفيش يبقى كوبين كبار مياه و معاهم مكعبين مرقه و ملح لو محتاجه و اسيبها على نار هاديه على ما اخلص حشو
- هحشي ورق العنب في نص الطاجن و النص التاني الباذنجان و الفلفل هوزعه فوق
- بعد ما اخلص حشو هغطي الطاجن بطبق صيني / بايركس / اركوبال (اللي موجود 😅) و أضيف عليه الشوربه عليه...... (الطبق عشان المحشي مايفكش، و عشان الشوربه ما تدخلش جوه الباذنجان والفلفل و تبعترهم 😀
- هحط الطاجن في الفرن و اظبط التايمر على 30 دقيقه
- اول ما التايمر يرن.. نتخض الأول 😂 وبعدين نطلع الطاجن من الفرن، نشيل الطبق اللي فوق ونسيبه يهدأ 10 دقائق
- نحط تشكيله في الطبق،، و بالهنا والشفا ♥️😍
عجبتك الوصفة؟
شوف كل وصفاتنا في مكان واحد
كل الوصفات →
شوف كل وصفاتنا في مكان واحد