→ كل الوصفات
#التحدي_الالماسي عمري مادقت طعميه في حياتي لا جاهزه ولا بيتي احلى من طعميه جدتي وللاسف انا مخدتش منها الطريقه جربت مرات كتير للطعميه البيتي كانت تبقي كويسه بس مش دي طعمية جدتي اللي بعتبرها وبشهاده كمان كل اللي كلها احلى من طعميه برا لحد ماوصلت للطريقه دي بالنسبالي وبالنسبه لعيلتي اجمل فطار لا يعلى عليه
المقادير
- كيلو فول مدشوش
- 5 راس بصل اخضر
- 5 فصوص ثوم
- 1 فليفلة حاميه خضره
- حزمه كزبره صغيرة
- حزمه بقدونس صغيرة
- 1 بيضه عند التسويه
- ملح
- كزبره ناشفه
- كمون
طريقة التحضير
- هننقع الفول المدشوش بعد مانغسله حوالي 12 ساعة ونغيرله الماء حوالي 3 مرات (ان ننقع الفول المده دي هيطريه ويساعده يستوي بسرعه في متفكروش تنقعوه اقل من 12 ساعة لاني جربت قبل كدا تبع وصفه معينه انقعه 4 ساعات بس مستواش ومتضربش كويس في الكبه لانه كان ناشف وكان طعمه باين مش مستوى في الطعميه)
- بعد مايتنقع الفول هتصفيه كويس جداً من الماء في مصفاه مش بايدك وتسبيه حوالي نص ساعة في المصفاه ينزل مايته الزياده اللي فيه والخطوه دي مهمه جداً لان اي ماء زياده فالطعميه هتفكها
- تحضري باقي المكونات زي الصوره اللي هي 5 رؤوس بصل اخضر (احلى طعم للطعميه بالبصل الاخضر مش العادي وبيغني كمان عن الكرات لان الكرات مش متوفر) و 4 فصوص ثوم كبار وفلفله خضره حاميه بتدي طعم جامد جداً ومش هتخليها حراقه وحزمه كزبره وحزمه بقدونس صغيرين (لو كترتي الخضره عن كدا او استخدمتي حزم كبيره الطعميه لونها هيغمق) ولازم تكون الحزم بدون عيدان تاخدي الجزء اللي فيه الورق عشان العيدان فيها كميه ماء كتيره هتفكلك الطعميه في الزيت
- هتخلطي كل المكونات متقطعه مع بعض (عشان تتوزع في الكابه) هتحطيهم في بوله كبيره ومش هنحط توابل او البيضه دول عند التسويه نتيجتهم بتبقي احلى كتير
- انا استخدمت الكبه دي يفضل الكبه الكبيره الصغيره هتتعبك جداً لانها بتأخذ كميات صغيرة ووقت اطول
- هتسيبي كل كميه في الكبه حوالي 10 دقائق (عايزه تفصلي في النص وتشغلي ماشي عشان الكبه متبوظش) لحد ماتبقي عجينه متجانسه تماما ناعمه جداً لون واحد زي بتاعت برا ومش محببه لان غير كدا الفول طعمه هيبقي باين ومش مستوي
- هتقلبي كل العجبنه مع بعض لما تطلعيها من الكبه عشان تتجانس المكونات وتتوزع بشكل متساوي تماما وهتوصلي فالاخر للون ده والنتيجه دي وطبعا عشان الكميه كبيره هتقسميها وتشيلي في الفريزر بدون توابل او بيض وتعملي اد احتياجك بس وبتطلعيها من الفريزر قبلها بليله في الثلاجه وتفك وتبقي كأنك لسه عملاها مفيش اي فرق انا مجربه الموضوع ده كتير جداً
- عند التسويه هتضيفي على الكميه بتاعتك اللي هتسويها ملح كمون كزبره بس مش اكتر من كدا عشان تحسي بجمال الطعميه وطبعا كميتهم حسب الكميه اللي بتعمليها وتكسري بيضه فوق كميه الطعميه بردو وقت التسويه وتربيها مع الطعميه مش لوحدها عشان تدخلي الهوا جوا الطعميه وتنفش ومتبقاش مكتومه (نفس اللي بتعمله مكنة الطعميه اللي بتلف دي عند المحل)
- ملحوظه البيض بينفش الطعميه ويخليها هشه جداً بنتيجه احسن الف مره من البيكنح بودرة وطعمه مالهوش اثر تماما مبيبانش ابدا ده غير الفايده والكالسيوم اللي فيه للكبار والصغار وفرصه مستخبي جوا حاجه بنحبها احسن من البيكنج بودرة الصناعي
- التسويه عشان الطعميه تطلع مستويه ومش شاربه زيت هتعمليها في طاسه ضيقه عميقه (الطاسه الاضيق احسن في توزيع الحراره والاحتفاظ بيها فالطاسه) وطبعا تحطي زيت عزير زي المحلات كدا اول ماتبدأي يكون الزيت سخن زي مالراجل بيعمل عشان الطعميه تمسك ومتفكش اول ماتحطيها بعد لما تبدأ تأخذ لون وتمسك نفسها هتهدي النار شويه بس مش اوي عشان متشربش زيت وتسيبها تأخذ وقتها فالسوا (لو مضروبه فالكابه كويس والفول منقوع وطري هتستوي حلو جداً من غير ماتلحق تغمق جامد) تقلبيها بعد ماتاخد لون حلو وتديها وقتها وتطلعيها على ورق مطبخ
- ممكن وانتي بتقرصيها تحطي سمسم على وجهها او كزبره ناشفه لزوم الحركات وتطلعيها وهي ساخنه وتقدميها وجنب باذنجان او ليمون معصفر وعيش سخن تاكليها والف هنا 😊😍
عجبتك الوصفة؟
شوف كل وصفاتنا في مكان واحد
كل الوصفات →
شوف كل وصفاتنا في مكان واحد