→ كل الوصفات

عجينه بيتزا وكاليزوني هشة وطرية و يها قرمشه بسيطه 🍕❤

#امي_جنتي

  • كيلو إلا ربع دقيق 750 جرام
  • 2 معلقة كبيره زبادي
  • معلقتين كبار لبن بودرة
  • 2 معلقة كبيره ونص ممسوحه سكر
  • معلقة صغيره ملح
  • معلقة كبيره ممسوحه بيكنج باودر
  • معلقة صغيرة ممسوحه شمر مفروم
  • 1/2 معلقة صغيرة توم بودره
  • 1/2 معلقة صغيره بصل بودره
  • معلقة صغيرة ممسوحه زعتر
  • معلقة كبيره ونص زيت
  • معلقة ونص كبيره خميره
  • معلقة صغيرة سكر
  • 1/4 كبايه ماء دافيه
  • 400 مل ماء دافي أو لبن رايب أو لبن حوالي 2 كبايه شاي متوسطه
  • 3 معالق كبار معجون صلصه
  • 3 معالق كبار كاتشب
  • 1/2 معلقة صغيره بصل بودر
  • 1/2 معلقة صغيره توم باودر
  • 1/2 معلقة صغيرة زعتر
  1. هنحط الخميرة و السكر و الماء على جنب تختمر
  2. نحط الدقيق على باقي المكونات بعد كدا الخميرة
  3. هنعجن باللبن الرايب أو أي كان اللي هتستخدميه شوية بشويه لحد ما تبقي طرية خالص و ناعمه مش بتلزق ممكن تأخذ من 350 ل 400 ملي على حسب
  4. بعد كدا هنجيب طبق ندهنه ب ملعقة زيت و نمسح الطبق و العجينه بالزيت و نغطي عليها وهنسيبها تختمر في مكان دافي كويس من ساعة لساعه ونص و هتطلع حلوه جداً معاكو بإذن الله.و أما تطلعوها عشان تعملوها سواء بيتزا أو كاليزوني هترشو الرخامه برشه دقيق و تقطعوها ل 4 اجزاء
  5. هنجيب الصواني و ندهنها زيت كويس و بعد كدا نجيب العجينه نفردها في الصينية براحة نص فرده في كل صينيه بعد كدا نجيب اول صينية تاني و نكمل بعد كدا نخرمها بالشوكه لو هتعملوها بيتزا هتخرموها كلها عشان متعلاش في الفرن بس طبعاً مش هتيجو ناحية الأطراف عشان تعلي عادي.أما لو كاليزوني هتخرمو نصها بس.هتحطو بقي الصلصة و الجبنة و أي حاجه عندكو
  6. هتسيبو بعد ما تخلصو العجينة ترتاح لمده من 5 ل10 دقائق قبل ما تدخلوها الفرن في الوقت دا الفرن يكون سخن على 200 قبل ما ندخل الصواني الفرن ب ربع ساعة على رف سفلي لمده 24 دقيقه تأخذ لون من تحت و بعد كدا نشغل الشوايه عليها من فوق تأخذ لون والجبنه تسيح و تبقي كويسة و بالف هنا و أن شاء الله تعجبكو❤❤
  7. ملحوظة :الجبنة معايا مساحتش لانها نوعها طلع مش حلو في نوع في الشرقية من ريماس لاند حلو جداا جداً و بيمط
  8. الكاليزوني انا دهنت وشه من فوق بالبيض عليه رشه فلفل اسود و حبه البركه
عجبتك الوصفة؟
شوف كل وصفاتنا في مكان واحد
كل الوصفات →