→ كل الوصفات

عدس بني بالصلصة ، عدس بجبة مطبوخ

طبعا كلنا طالعين من العيد وزهقانين من اللحمة وانا شخصيا كمان هزود اني زهقانه من المطبخ ومش قادرة أقف فيه كتير🤦‍♀️ ، فالنهاردة عملت الوصفة الجميلة دي بتركات مختلفة شوية وكانت لذيذة اوي ، وطبعا كلنا عارفين ان العدس البني دة بديل جبار للحوم يعني تاكليه مع شوية ارز كدة وسلطة وانتي مطمنة انك استفدتي جامد جدا من وجبتك 👌😉

  • ½ كيلو عدس بني مسلوق في ماء ومتصفي
  • بصلة مبشورة
  • م ص ثوم مفروم
  • قرن فلفل حار (اختياري)
  • كوب من ماء سلق العدس
  • 2 كوب عصير طماطم
  • 3 م ك صلصة
  • 2 حبهان ، ورق لوري
  • م ك كمون
  • م ص (فلفل اسود ، كزبرة)
  • 2 مكعب ماجي
  • ملح حسب الاحتياج
  • ارز بالشعيرية بالبصل (في الوصفة القادمة)
  • مخلل بصل
  • سلطة خضرة
  1. أولا : بتسلقي العدس في ماء وبعدين احتفظي بكوب من ماء السلق وصفي العدس بعد كدة واشطفيه بماء فاتر ،
  2. في حلة حطي سمنة او زيت وانزلي بالبصل والثوم والفلفل الاخضر والحبهان والورق اللوري وشوحي كله مع بعضه لحد لما البصل يغمق شوية ،
  3. بعدين نزلي عصير الطماطم وماء السلق والصلصة والتوابل والماجي وسبيهم لحد لما تغلي وتتسبك كويس ، وبعدين نزلي عليها العدس واظبطي الملح وسبيه ياخد غلوة مع الصلصة وبس كدة ،
  4. قدمته مع ارز بالشعيرية بالبصل (في الوصفة القادمة) ، ومخلل بصل بيبقي تحفة معاه ، وسلطة وبالف هنا 🙂
عجبتك الوصفة؟
شوف كل وصفاتنا في مكان واحد
كل الوصفات →