→ كل الوصفات

غراتان بادنجال والأرز بصلصة البولونيز

#الشيف_الذهبي اللهم صلّ وسلّم وبارك على سيدنا محمد، حبيت نشارك معاكم اليوم غراتان بادنجال 🍆والأرز 🍚بصلصة البولونيز🥘 طبق متكامل ومشبع ينحي حيرة العشاء أو الغذاء، جا بزاف بنين 😋👌🏻😋، نتمنـى تعجبكـــم الطريقــــة، أمسيــة سعيدة أحبتي 💐

  • كاس أرز بسمتي
  • ماء للسلق
  • ½ مكعب مرق الخروف
  • ورقة رند
  • ملعقة صغيرة زبدة
  • للصلصة نحتاح
  • حبة بصلة متوسطة مقطعة رقيق
  • 3 فصوص ثوم مرابي
  • حبة زرودية (جزر) مرابية بالرقيق
  • 350 غ لحم مفروم (كفتة البقري)
  • 2 حبات طماطم مرابية
  • 1 ملعقة كبيرة طماطم مصبرة
  • للتوابل نحتاج
  • 2 ورقات رند
  • ملعقة صغيرة مملوءة فلفلة حمرة (بابريكا)
  • ¼ ملعقة صغيرة فلفل أسود
  • ½ ملعقة صغيرة كركم
  • ½ ملعقة صغيرة سكين جبير
  • الملح حسب الذوق
  • على راس الملعقة قرفة (إختيارية)
  • ½ ملعقة صغيرة سكر
  • رشة من الزعيترة محكوكة بين يدي
  • للخضار نحتاج
  • 3 حبات بادنجال مقطعة بالطول
  • 2 حبات بطاطا مقطعة دوائر
  • 3 حبات قورجات (قرعة) مقطعة دوائر
  • للتزيين
  • كمية من الجبن المبشور (استعملت نابولي والقليل من جبن موتزريلا)
  1. نبدأ بإسم الله، أولا نعبر كاس أرز إستعملت بسمتي نوعية روعة وهو صح روعة ههه، غسلتو مليح وخليتو مدة نصف ساعة في الماء، نقيت الخضرة اللي نحتاجها في هاذ الوصفة. ملاحظة مهمة: ✔الكاس اللي عبرت بيه الأرز سعته 200 ملل
  2. في مقلاة نحط الزيت يسخن شوية نضيف عليه البصل مقطع رقيق نخليه يذبال ثم نضيف الثوم مبشور ونخلط مليح
  3. ثم نضيف الجزر (رابيتو بالجهة الرقيقة) نذبلو شوية على نار أقل من المتوسط إلى هادئة، نخلط مليح حتى تنسجم المكونات، نضيف اللحم المفروم (استعملت كفتة البقري)
  4. وخلطت مليح غلقت عليها وخليتها مدة 5 دقائق، ثم ضفت ورقات الرند مع الطماطم المصبرة خلطت حتى نساجمت كل المكونات
  5. نخليها طيب شوية ثم نضيف التوابل (الملح، الفلفل الأسود، الكركم، القرفة، فلفلة حمرة، سكين جبير) نخلط كل المكونات ثمّ نضيف الطماطم مرابية ونخلط مليح، نغلق عليها ونخليها طيب على خاطرها
  6. ثم نضيف السكر لتعديل الذوق، وفي الأخير نضيف رشة من الزعيترة تزيد في البنة، خليتها تعقد شوية وطفيت عليها
  7. كنت سلقت الأرز في ماء فيه ورقة رند مع نصف مكعب مرق الخروف حتى طاب نسبة 90 بالمائة كي طاب صفيتو ضفت عليه ملعقة صغيرة زبدة و2 ملاعق كبار من الصلصة اللي وجدنا من قبل وخلطت حتى انساجمت المكونات خليتو بجيه
  8. نقلي كل من البطاطا والقورجات والبادنجال، اللي نقليه نحطو في ورق ماص باش نتخلص من الزيت
  9. وجدت صينية تدخل للفرن من الأحسن من الزجاج دهنتها بالقليل من المارقرين وحطين في الأول القليل من الصلصة
  10. ستفت دوائر البطاطا ثم دوائر القورجات ثم شرائح البادنجال
  11. فرغت الأرز وسويت السطح جيدا ثم فرغت القليل من الصلصة مشيتها على كامل المساحة
  12. وعاود ستفت الخضر بنفس الترتيب من فوق البطاطا ثم القورجات ثم البادنجال، ثم فرغت باقي الصلصة
  13. سويتها مليح ومن فوق حطيت الجبن المبشور (استعملت نابولي وجبن الموتزاريلا)
  14. ودخلتها للفرن المسخن مسبقا على درجة حرارة متوسطة، دات معايا تقريبا 20 دقيقة، كي طاب من تحت طفيت عليه وشعلت عليه من فوق يدي لون ذهبي
  15. وقدّمتو بألف صحة وهنــا 😋👌🏻😋
عجبتك الوصفة؟
شوف كل وصفاتنا في مكان واحد
كل الوصفات →