→ كل الوصفات
من أروع التتبيلات اللي جربتها حرفيا و بنكهة الحاتي وافخم المحلات جربوا الفراخ المشوية دي بطريقتي هتدعيلي عليها والله وهتبهري بيها ولادك و ضيوفك. كان عندي عزومة وعملتها فيها كانت روعة بفضل الله وعجبتهم جدا.. الطريقة دي ل ٣ فرخات بوزن ٥ونص كيلو تقريبا..
المقادير
- 3 فرخات ابيض بوزن 5.5 كيلو
- 3 حبات طماطم
- 3 بصلات كبار او 6 متوسطين
- راس ثوم وسط مفروم(10 فصوص) تقريبا
- 3 م ك زيت دوار شمس
- 2 م ك كاتشب
- 2 م ك صوصا صوص
- 2 م ك ورشيستر صوص (صوص محار) او أورشستر شاير صوص (صوص المشاوي)
- 2 م ك عسل
- 1/4 كوب خل
- 1/4 كوب عصير ليمون
- عصير برتقالة كبيرة او 2 وسط (بلدي او صيفي او بسرة) مش سكري
- قرن فلفل أخضر حامي او بارد حسب الرغبة
- البهارات الخاصة بالتتبيلة 👇
- 6 م ص ملح عيارية (لكل فرخة 2 م ص)
- 3 م ص بهارات فراخ
- 1.5 م ص فلفل اسمر
- 1.5 سماق
- 1.5 زعتر (يوناني)
- 3/4 م ص حبهان بودر
- 3/4 م ص بابريكا
- 1/2 م ص السبع بهارات
- 6 فصوص مستكة بودر
- بهارات صحيحة في ماء الشواء 👇
- حبهان.. ورق لورا.. رزو ماري.. زعتر
طريقة التحضير
- بسم الله اللهم صل وسلم على نبينا محمد وعلى آله وصحبه أجمعين وسلم تسليما كثيرا إلى يوم الدين ❤️ نغسل الفراخ كويس جدا و نسيبها تتصفي كويس اوي ولازم تكون ناشفة عشان تشرب كويس من التتبيلة
- في الكبة او الخلاط هنضرب البصل والطماطم ونضيف عليهم ربع كوباية ماية عشان تخليهم مضروبين كويس اوي ونستخلص اكبر كمية من الماية بتاعتهم
- نصفيهم في شاشة ونضع ماء البصل والطماطم ونضيف عليهم التوابل و الكاتشب والصويا صوص وصوص المحار او المشاوي والملح وعصير الليمون والبرتقال و العسل ونقلب كويس جدا 👈 في الكبة هنضرب التوم مع الخل وقرن الفلفل ونضيفهم عليهم ونقلب
- نظبطت الملح ولازم يكون عالي سنة بسيطة عشان تطلع الفراخ مظبوطة وملحها مظبوط وأهم حاجة نغرز الفراخ بالسكينة في الصدر والمفاصل و الوراك ونزلها في التتبيلة ليلة كاملة وممكن ليليتن قبل الشوي
- نسخن الفرن كويس جدا على أعلى درجة حرارة عندنا ونجيب صينية فرن و شبكة وندهن الشبكة بالزيت اولا ثم نرص الفراخ عليها نضيف ماء مغلي في الصينية مع زعتر و روز ماري وحبهان ولورا وجزء من الخلطة اللي الفراخ كانت متبلة فيها
- ندخلها الفرن على الرف الأقرب للارضية لمدة نص ساعة على أعلى حرارة وبعدين نخرجها وندهنها بالفرشاة بالخلطة وندخلها تاني ونوطي الحرارة على ٢٢٠ او ٢٠٠ ونرفعها للرف اللي في النص و نكرر العملية مرتين تلاتة ونخليها تكمل سوا ونراقب مستوى الماية فيها عشان تستوي كويس وتبقى جوسي
- نكون مجهزين قطعتين تلاتة فحم مشتعلة وزي الجمر و لما الفراخ تستوي نضعها في صينية و نحط الفحم وننزل علية بمعلقة سمنة مش زيت لان السمن بيدي ريحة احلى وطعم أقوى للفحم و نغطيها كويس عشان تاخد ريحة الفحم
- تقدم ساخنة ونفرش تحتها بقدونس و تؤكل بالف هنا ♥️ 😋
- ملحوظة 🤓 ١ وزن الفراخ للشوي يفضل تكون ١٦٠٠ لحد ١٨٠٠ جرام متقلش عن كدة عشان تبقى جوسي وطرية متنشفش٢ الفرخة بتاخد حوالي ٢ م ص ملح عيارية ميزدتش عن كدة ٣ ضروري اننا ندهنها بالتتبيلة مرتين تلاتة وهي بتستوي عشان تفضل طرية وتاخد لون حلو ٤ بعتزر عن الصورة عشان مش دي صورة الوصفة الأصلية لاني ملحقتش اصورها بسبب الضيوف 😅 بس دي وصفتي لفراخ بطريقة تانية
- أخيرا اللهم أغفر لجدتي وارحمها واسكنها فسيح جناتك يارب العالمين 🤲
عجبتك الوصفة؟
شوف كل وصفاتنا في مكان واحد
كل الوصفات →
شوف كل وصفاتنا في مكان واحد