→ كل الوصفات

فول مدمس على طريقه امي

احنا هنا بندمسه في فرن العيش بعد ما بنخلص عيش شمسي بنحطه في المكان اللي بنحط الوقيد فيه ويطلع جميل بس للاسف انا هنا مفيش كده وامي قلتلي على دمسه الرمل

  • كيلو فول حبه كبيره
  • كوب عدس اصفر كوب فول مجروش
  • خل
  • بيكربونات الصوديوم
  • ليمون
  • حله بها رمل
  • ملعقتين دقيق
  1. ننقع الفول في ميه سخنه ونحط بيكربونات الصوديوم لمده ٣ ساعات فقط مش بالليل عشان لما بننقعه من بالليل مش بيطلع الغازات اللي في الفول
  2. بعد النقع هتلاقو لون الميه مقارب للاسود هي دي الغازات
  3. نغسل الفول كويس مره واتنين وتلاته ونكون مجهزين حله ميه بتغلي وكمان نحط حله الرمل عشان تسخن
  4. نغسل العدس والفول المجروش ونجيب الفواله ونحط الأول الفول وننزل بالعدس والمجروش لازم الخطوه دي عشان العدس مينزلش في القاع ويتحرق
  5. بعد كده نجيب الميه اللي بتغلي وبالمغرفه ننزل على الفول واحده واحده لحد ما نغطي الفول كويس وزياده كمان
  6. الخطوه المهمه انه لازم نحكم غلق الفواله عشان ميدخلش هوا ويسود الفول انا بحط طبق استانلس صغير واتقله بشويه ميه
  7. نحط الفواله في دمسه الرمل نعمل زي حفره هيكون الرمل سخن ونتركه لمده ٣ ساعات بالظبط ومنفتحش عليه
  8. نحط ميه وبها خل وليمون مقطع ونسيبه يغلو دول يفضلو جاهزين لزياده على الفول بعد ما نفتحه بعد ٣ ساعات الخل هيفتحه
  9. لما يستوي نفضل بدواسه ندوس وهيتدمس خالص والخطوه الاخيره نجهز ملعقتين دقيق وندوبهم بالميه وننزل على الفول ونسيبه في حله الدمس لحد ما يبرد ونكيسه ونحطه في الفريزر وبالهنا والشفا
  10. البيكربونات هتطري الفول ويستوي بسرعه
عجبتك الوصفة؟
شوف كل وصفاتنا في مكان واحد
كل الوصفات →