→ كل الوصفات
Baked feta pasta ,, feta cheese pasta ,, فيتا مكرونة اللي قالبة الدنيا يا جماعة 😉 ، تقريبا كله عملها الا انا والحمدلله اني جربتها لان فعلا فعلا تستحق التجربة وحياة ربنا بجد مش كلام ، وصفة كااااارثية بمعني الكلمة 😋 كمية التناغم اللي في الاطعمة اللي فيها بتاخدك في حتة تانية خاااالص 😇 ، كل اللي فات من وصفات المكرونة دي حمادة ووصفة المكرونة دي حمادة تاني خاااالص بجد 🙈
المقادير
- كيس مكرونة مسلوقة
- علبة جبنة فيتا 500 جرام (استخدمت طعم براميلي)
- طماطم شيري (كميتها حسب الرغبة) او طماطم مقطعة صغير
- 1 بصلة خضرة باوراقها او بصل عادي مقطع
- شرايح فلفل هالبينو (اختياري) بس تحفة معاها
- م ص ثوم مفروم
- م ص من كل
- زعتر
- ريحان
- فلفل
- بابريكا ويفضل بابريكا مدخنة
- كاري (اختياري)
- مكعب ماجي فراخ
- زيت زيتون او عادي
طريقة التحضير
- في الصينية بتاعتك ضعي كل المكونات السابقة (الجبنة ، الطماطم ، البصل ، الثوم) وبعدين رشي التوابل والماجي(افركيها بايديك) علي الجبنة والصينية كلها ورشي شوية زيت زيتون علي كل الصينية برده بس شوية حلوين ،،
- بعدين دخليها الفرن لحد لما الجبنة تسيح ، وهتلاقي الطماطم لسة جامدة شوية (ممكن تشوكي الطماطم بشوكة او سكينة عشان تستوي اسرع) ، هدي بقي الفرن خالص وسبيها تستوي وتتخبز براحتها علي الاخر بس رقبيها عشان متتحرقش منك ،،
- بعدين طلعيها وهتلاقي بجد ريحة مش طبيعية قالبة البيت 🙈 اهرسيها بشوكة كدة وقلبي كله مع بعضه ،،
- نزلي عليها كمية المكرونة اللي تناسبك (انا ماخدتش الكمية كلها عشان بحب الصوص يبقي اكتر من المكرونة) ،وقلبي كله مع بعضة براحة بشوكة كدة ،،
- ويالا دوقي 😉واستمتعي 😋وادعيلي بقي❤ وبالف الف الف هنا 🙂 ،،
- ملحوظة : المكرونة متسلوقيهاش جامد عشان متتهريش منك فالصوص. الجبنة حاولي تختاري نوع يكون طري عشان تسيح معاكي بسرعة وتديكي كمية الصوص اللي انتي شوفتيها دي ولو طلعت مش كدة وعاوزة تخففي الصوص احتفظي ب (كوب من ماية سلق المكرونة او لبن) وخففي بيها لو احتجتي
- متخفيش من مكعب الماجي وتفتكري انها هتكون حادقة ، لا خالص هتطلع مظبوطة جدا 👌😉، واخيرا المكرونة دي ملهاش قاعدة يعني ضيفي او شيلي اي مكون من خضار او توابل او لو عاوزة تضيفي لحوم بقي (مشروم ، فراخ مستوية ، لحمة مستوية ، ، سجق مستوي ، لانشون ، تركي مدخن ، تونة) ابدعي بقي 🥰 ممكن اضافة شرايح زيتون مخلي واي نوع خضرة تفضليها ،،
عجبتك الوصفة؟
شوف كل وصفاتنا في مكان واحد
كل الوصفات →
شوف كل وصفاتنا في مكان واحد