→ كل الوصفات

قطايف مقرمشه بالتمر والمكسرات 😍😍

#حلويات_رمضان

  • 1/2 كيلو قطايف
  • عجوه او تمر منزوع النواه ومقسوم نصين
  • مكسرات جوز هند وزبيب ومكسرات او زي ما تحبي
  • معلقه كبيره سكر
  • معلقه صغيره قرفة لو مش عايزه بلاش
  • السيرب
  • 2 كوب سكر
  • ا كوب ماء
  • عصره نص ليمونه
  • رشه فانيليا
  1. هحط الماء والسكر وعصير النص ليمونه على النار واسيب الشربات لحد ما يعقد ويتقل معايا وبعدين اطفي واسيبه يبرد خالص وبعدين احط رشه الفانيليا ولازم الفانيليا تتحط على السيرب او اي مهلبيه وهيا بارده لان لو حطيت الفانيلا والحاجه بتاعتي ساخنه ريحتها بتروح انما لما بحطها على المهلبيه او السيرب وهما باردين ريحتها بتفضل ظاهره
  2. هجيب المكسرات بتاعتي والسكر والقرفه واقلبهم كويس ويبقى كده الخليط بتاعي جاهز
  3. بجيب بقى القطايف بتاعتي وبحط في النص قطعه من التمر وبعدين احط شويه مكسرات بس نأخذ بالنا ان القطايف متبقاش مليانه حشو عشان متفرقعش في الزيت مننا
  4. بعد كده هحط طاسه او حله على النار واحط فيها زيت غزير واسيبه يسخن وبعد كده احط القطايف بتاعتي واهدي النار عليها التكه دي بتخلي القطايف تطلع مقرمشه وبتفضل مقرمشه لحد اخر قطايفايه 😂😂
  5. لما القطايف بتاعتي تأخذ لون ذهبي من تحت بقلبها الناحيه التانيه ولما تتاخد لون ذهبي برضه بطلعها في السيرب بتاعي القطايف ساخنه والسيرب تقيل وبارد وبعد كده بحطها في مصفي عشان تتصفي من السيرب الزياده
عجبتك الوصفة؟
شوف كل وصفاتنا في مكان واحد
كل الوصفات →