→ كل الوصفات
❤️ سبحان الله وبحمده سبحان الله العظيم ❤️ #تحدي_العيد وصفة جديدة ومختلفة لكحك العيد تنافس أشهر المحلات في جودتها وفخامتها حرفيا 👌 وصفة من الاخر للكحك الفاخر والمميز بفضل الله ❤️
المقادير
- كيلو دقيق كل الاستعمالات او فاخر إلا نص كوب
- 1/2 كوب نشا
- 520 جرام سمنة
- 1 م ك خميرة (عيارية) 10 جرام
- 1 م ك سكر (عيارية 10 جرام)
- 1 م ك بيكنج بودر (عيارية 10 جرام)
- 1 م ك ريحة الكحك
- من 4لـ5 ما ك عيارية (من 40 لـ50 جرام) سكر بودرة منخول
- 3 م ك سمسم محمص
- 25 جرام لبن بودر (2.5 ما ك)
- 200 ملي ماء دافي (كوب عياري)
- للحشو 👈 1/4 كيلو ملبن +1 ما ك سمنة ومكسرات +2م ك سمسم محمص
طريقة التحضير
- بسم الله اللهم صل وسلم على نبينا محمد وعلى آله وصحبه أجمعين وسلم تسليما كثيرا إلى يوم الدين ❤️ في حلة نسخن ٥٢٠ جرام سمنة ونخليها تسخن كويس منخليهاش تغلى او تقدح ونركهنا على جنب تهدي خالص ثم ندخلها الثلاجة على الاقل ٦ ساعات ويفضل قبلها بليلة نعمل كدة وهقولك السبب بس خليكي معايا 😉
- 👈ننخل الدقيق مع السكر البودر والبيكنج بودر وذرة الملح واللبن البودر وريحة الكحك ثم نضيف السمسم ونقلب جيداً 👈 في بولة او كباية كبيرة نقلب الخميرة وملعقة كبيرة سكر مع كباية الماء الدافية ونركنها على جنب لحد ما تفور وتعلي معايا على ما نخفق السمنة
- في العجان او المضرب الكهربائي او المضرب السلك نضع السمنة الباردة من الثلاجة (نخرجها قبل ما اشتغل بنص ساعة بس مش عايزاها سايحة) ونضربها جيداً لحد لونها ما يفتح شوية معايا وتعمل زي الكريم شانتيه (تبقى هاشة ولونها فاتح شوية) ثم نضيف الدقيق ونخلية يتبس كويس جداً هنلاقي شكلة بقى كدة 👇
- نستمر في العجن لمدة ٥ دقائق ثم نضيف خليط الخميرة والماء لية ونستمر في العجن لحد ما يبقى قوام العجينة مثالي واضغط عليها بأيدي متشققش مني زي كدة 👇
- نلم العجينة ونخليها ترتاح شوية وممكن نخليها في الثلاجة لحد ما نجهز الحشوة كالتالي 👇 👈 نقطع الملبن مكعبات صغيرة ونبل ايدينا بالسمنة ونبدأ نفرك ونعجن الملبن بية كويس جداً لحد ما يبقى زي العجينة معايا نضيف المكسرات لية لو حبينة بمكسرات او نخلية سادة ونبدأ نكورة كور صغيرة حوالى ٥ جرام (اكبر من البندقة شوية) ونخلي الكور على جنب 👈 في طاسة نحمص المكسرات اللي عندنا سواء بندق او عين جمل (جوز)ومجرد ما تتحمص نفضيها في طبق ونخليها تهدي على جنب
- نسخن الفرن على ١٧٠ قبل بدء الشغل على الاقل بربع ساعة ونبدأ نأخذ كورة في ايدينا من العجين تقريبا ١٠ او ١٥ جرام ودة هيديني كحكة وسط تقريبا وحجمها لذيذ اوي ونبدأ نحشيها ونقفل على الحشوة كويس وننقشها بالمنقاش او بالبصامة ونرصة جنب بعض مع مراعاة المسافات بينهم لانة بيكبر في الفرن شوية.. تقريبا بياخد من ١٥ ل ٢٠ دقيقة ولما ياخذ لون من تحت نفتح عليه الشواية ياخذ لون حلو لو مكانش اخد
- نخرجة من الفرن ومنحركوش من مكانة الا لما يهدي لانة هش جداً ونااااعم ممكن يتكسر 👇
- ملحوظة 🤓 ١ ـ نوع الدقيق مهم جداً وبيفرق انا اشتغلت بالضحي ٢ـ نوع السمنة مهمة جداً وممكن نخلي نص المقدار سمنة بلدي والنص التاني نباتي وممكن التلتين بلدي والتلت نباتي عشان التكلفة ٣ـ اللبن البودر مش اساسي بس بيدي غناوة للطعم ٤ـ ريحة الكحك أختياري بس بتدي طعم حلو اوي واستخدموا الفاتحة مش الغامقة عشان تطلع الكحكة فاتحة 😉 وفي المحلات بيستخدمو ريحة الموز مع ريحة الكحك او من غيرها بس الأساسي ريحة الموز هي اسمها كدة لاكن طعمها مش موز ولا حاجة 🤓
- ٥ـ لو هنستخدم دقيق كحك وبسكويت هنشيل منة ربع كوب بس او معلقتين كبار ونستبدلهم بربع كوب نشا او معلقتين ودة لو عوزينة ذائب شوية ولو حابينة في سنة قرمشة او خشن سنة مش هنستخدم النشا خالص ونخلية كله دقيق بشرط يكون كحك وبسكويت.. لو مش متوفر النوع دة هنستخدم 👈دقيق كل الاستعمالات او فاخر ونشيل منة معلقتين بس دقيق ونزود مكانهم معلقتين نشا ودة هيخلية ناعم وفي سنة قرمشة مش خشن خالص
- 👈 لو مش عايزينة فاخر (كحك عادي) نستغني عن النشا تماما واللبن البودر ونخلي المقدار كله دقيق بدون نشا لو حبينة خشن شوية او في سنة قرمشة مش ذائب نخلي مقدار السمنة ٥٠٠ جرام فقط ونزود الماء ربع كوب يعني هنعجنة بـ(كوب وربع ماء) 😉
- ٦ـ التسوية بقى 😋 الكحك السادة على ١٤٠لـ١٦٠ حسب الفرن بياخد من (٢٠ ل ٣٠ دقيقة) الكحك اللي بملبن او مكسرات من ١٧٠ لـ ١٨٠ حسب الفرن بياخد من (١٥لـ٢٠ دقيقة) الكحك بالعجمية من ٢٢٠لـ٢٤٠حسب الفرن بياخد من (٨لـ١٠ دقائق) عشان العجمية متخرجش برة الكحك ويشقق
- سر السمنة الساخنة 😉👈 الخطوة دي مهمة جداً اني اسخن السمنة ومقدحهاش واستخدمها على البارد فيما بعد اولا هتديني طعم الكحك الأصلي بتاع جداتنا وفي نفس الوقت مش هيعمل حموضة او هيبقى تقيل عالمعدة ثانيا دة بيخلي الكحكة ناااعمة وهشة وخفييييفة جداً يعني بضرب ٣ عصافير بحجر واحدة 😂 طعم اصلي خفيف عالمعدة.. هش ونااااعم وخطير 👈انا كدة قولتلكم كل أسرار الكحك الفاخر اللي بيتباع برة بمبلغ وقدرة وسعر مبالغ فية الحقيقة 🙄
- أخيرا اللهم أغفر لجدتي وارحمها واسكنها فسيح جناتك يارب العالمين 🤲 وثقل ميزان حسناتي وحسناتكم يارب 🌹 😍 ❤️
عجبتك الوصفة؟
شوف كل وصفاتنا في مكان واحد
كل الوصفات →
شوف كل وصفاتنا في مكان واحد